– Lindåstunet trygt nok

Den ferske rapporten er utarbeidd av Trygve Conradi i konsulentfirmaet Sweco på oppdrag frå Lindåstunet AS, selskapet som driv den nedleggingstruga institusjonen.
Conradi er tidlegare brannsjef i Bergen og har drive det første reine brannrådgjevingsfirmaet i Noreg.

Har to rapportar
Han inspiserte Lindåstunet torsdag for ei veke sidan, og leiinga i Lindås kommune fekk tysdag ein rykande fersk brannrapport. No sit kommunen med branntekniske risikovurderingar frå to konsulentar som konkluderer vidt forskjellig.

Rapporten frå Sweco er på 17 sider, relativt detaljert, og viser til aktuelle lover og føresegner. Frå Skansen Consult føreligg det så langt to halvsider med tekst. 

Ståle Eilertsen i Skansen Consult har i ei vurdering frå 5. juli skrive at heildøgnsdrifta i andre etasje på Lindåstunet bør avviklast ”umiddelbart”. Skansen Consult meiner at det også er uforsvarleg å ha bebuarar i første etasje, og tilrådde at bygget i ein avviklingsperiode fekk vaken nattevakt på stadige brannrundar i bygget. Ei slik ordning er innført.

Ikkje noko alvorleg
Trygve Conradi i Sweco konkluderer med at «både person- og verdisikkerheten ved Lindåstunet i dag i hovedsak ligger innenfor gjeldende forskriftskrav». Denne konsulenten har ikkje funne alvorlege branntekniske avvik i forhold til aktuelle krav.

Conradi synest dessutan det vil vera fornuftig å ta i bruk ein tredje etasje på Lindåstunet som i dag ikkje vert nytta til noko som helst. Tredjeetasjen er dekka av både sprinklar- og alarmanlegga i huset. Konsulenten meiner at dette planet kan nyttast til forskjellige føremål, føresett at ei av trappene opp til etasjen vert litt justert. Her vil likevel ikkje Conradi plassera personar som treng bistand til å rømma frå ein brann.

Taus styreleiar
Styreleiaren i Lindåstunet AS, Ove-Jan Paulsen, vil førebels ikkje seia noko om den nye brannrapporten frå Sweco, utover å stadfesta at den er tinga og oversendt til Lindås kommune. Han ønskjer ikkje å kommentera innhaldet, og grunngjev det med at han i dag, torsdag, skal ha eit møte med representantar frå kommunen om rapporten.

Kommuneadministrasjonen har alt føreslege for den politiske leiinga at kommunen skal avvikla samarbeidet med Lindåstunet, på bakgrunn av brannrapporten frå Skansen Consult. På Lindåstunet har det føregått utflytting frå andre etasje, og berre tre bebuarar er no tilbake her.

Saka skulle handsamast i formannskapet sist torsdag, men møtet vart utsett på grunn av den spesielle situasjonen etter terrorhandlingane i Oslo og på Utøya. No kjem saka opp 25. august, og Skansen Consult er bedne om å vera til stades med folk på møtet.