Lite støy frå prøveskyting

Kommunestyret, grunneigarar og andre interesserte var torsdag på synfaring i Haukåsen, i området der Radøy Skyttarlag ønskjer å etablera ei skytebane. Etter synfaringa vart det gjennomført prøveskyting.

Lite støy
Strilen stod saman med politikarar og andre ved Samfunnshuset under prøveskytinga. Under prøveskytinga med hagle, høyrde me ikkje eitt einaste av dei fem skota. Me høyrde derimot rifleskota, men berre dersom ingen prata eller ingen bilar køyrde forbi. Støy i dette området skulle difor ikkje verta noko problem i tilfelle det vert skytebane i Haukåsen. Det var meir støy frå ei gravemaskin på Sletta, enn frå skytinga i Haukåsen. Ordførar Olav Steinar Namtvedt stod ved kyrkja under prøveskytinga. Han meiner at han høyrde 4 - 5 av det rundt 15 rifleskota som vart skotne.
? Eg trur nok at dei høyrde meir utover mot Lometjødna, seier Namtvedt.
Martin Soltveit frå skyttarlaget seier til Strilen at det er planlagt støydemping ved standplass. Det vert gjort ved å setja opp veggar på begge sider og bak der skyttarane står eller ligg medan dei skyt. Dette vil dempa støyen langs dalføret, medan lyden vert retta mot Haukåsen.

Fryktar «bandlegging»
Men det er fleire andre grunnar enn frykt for støy som gjer at mange er imot at det vert bygt skytebane i Haukåsen. Enkelte snakkar om «bandlegging» av eit relativt stort område rundt skytebana. Når riksvegtraseen kjem like ved den planlagde skytebana, kan dette til dømes gjera det meir aktuelt å setja opp bustader i området. Med ei skytebane like ved, fryktar dei at dette vert vanskelegare, truleg umogleg, å få løyve til. Dei som nyttar nærområdet ved Haukåsen til turar, vil også høyra meir til skytinga enn på sjølve Sletta. Til det sa Andre Michelsen i skyttarlaget at det berre vil føregå skyting ved bana i omlag fem prosent av tida med dagslys. Det vil difor vera nok av høve for turgåarar å nyta stillheita i området, meinte han. Fungerande rådmann Leif Taule har rådd politikarane til å seia nei til den framlagde reguleringsplanen for skytebana. Han argumenterer med at grunneigarane har sagt nei til å selja grunn frivilleg, og at einaste måten å skaffa seg grunn på difor er å gå til oreigningssak.
Dette vert nok og kanskje det vanskelegaste for politikarane, då dei veit at eit positivt vedtak til reguleringsplanenkan føra til oreigning.
Saka skal no opp igjen til behandling i planutvalet 25. oktober, før kommunestyret tek endeleg avgjerd.
Kornelius Manger tok opp att for politikarane på synfaringa, at Radøy Skyttarlag kjem til å verta nedlagd dersom politikarane ikkje godkjenner reguleringsplanen.
? Eg har fått kritikk for å ha sagt dette, men eg står på det. Det er ikkje aktuelt å halda fram ved skytebana på Manger. Me har brukt 130.000 kroner på denne siste reguleringa, og har ikkje ressursar til å gå ein runde til. Anten vert det skytebane no, eller så vert det ikkje, sa Manger.