Liten prisskilnad på bensin

Prisane endrar seg heile tida, og ein skal ein skal verkeleg følgja godt med dersom ein skal kjøpa det billegaste drivstoffet til ei kvar tid. Difor kan prisane har vorte endra i går etter at Strilen undersøkte prisane. Me sjekka prisar på fjorten bensinutsal i Nordhordland og Gulen, og ved ti av desse låg prisen på 95 blyfri mellom kr 10.68 og kr 10.84 literen. Prisen var høgast i Eivindvik med kr 11.98 per liter og billegast ved 1,2,3 i Isdal med kr 10.68. Måndag formiddag undersøkte Strilen prisane ved seks bensinutsal, og då var 1,2,3, i Isdal nest dyrast av desse. Men prisen vart sett ned på denne stasjonen alt om ettermiddagen.

Billegare enn Bergen

Trass i små prisskilnader mellom dei fleste stasjonane som vart sjekka i Nordhordland, var desse rimelegare enn ved tre tilfeldige utsal me kontakta i Bergen. Ved Hydro Texaco i Fanaveien var prisen kr 11.16, ved Fjøsanger Autosenter (Statoil) var prisen kr 11.15 og ved Hydro Texaco Fjøsanger var prisen kr 11.11. Også ved ein tilfeldig utvald stasjon på Askøy, Shell på Kleppstø, var prisen høgare; kr 11.25 for 95 blyfri.

I Oslo derimot kan dei for tida kjøpa 95 blyfri til under 10 kroner literen. To tilfeldige utsal som me kontakta i Oslo sentrum selde i går bensin til kr 9.85 for literen. Men etter det Strilen kjenner til hender det rett som det er at bensinprisane fyk opp i kr 11.50 midt i veka også i hovudstaden. I helgene vert gjerne prisane sette ned.

Fast pris på Fedje

Ved utsal med relativt lite kundegrunnlag og få andre utsal i nærleiken er rammevilkåra annleis enn ved stasjonar med stort kundegrunnlag og meir konkurranse. Terje Stormark på Fedje opplyser at dei fyller opp tanken og held same pris til tanken er tom.

Då kundegrunnlaget ikkje er så stort, tek dette ei tid. No er prisen kr 11.75 per liter 95 blyfri, men siste tank selde dei til ein pris som var gunstig samanlikna med andre stader, seier han. Han meiner difor at dette jamnar seg ut over tid.