Lokale rektorar skal undervisa meir

Dette føreslår rådmann Øistein Sævik. Administrasjonen av dei sju småbarneskulane i Lindås har vore ein gjengangar både i media og i det politiske miljøet. Rådmann Øistein Søvik gjekk i fjor sommar inn for å la ein rektor ha ansvar for Seim, Skodvin og Festo skular og ein ha ansvar for Eikanger, Leiknes, Myking og Kløvheim. Etter at Utdanningsdirektøren i Hordaland fastslo at ei slik løysing ikkje var lovleg, er det no lansert ein ny modell, som skal opp til godkjenning i formannskap og kommunestyre i dag.

Lokal rektor
No skal ein einingsleiar ha det administrative ansvaret for dei to skulegruppene, men kvar skule skal ha sin lokale rektor. Men vedkomande skal bruka meir av tida si til undervisning enn dei gamle rektorane gjorde. Tanken bak er at einingsleiaren skal ta seg av ein del av dei oppgåvene som rektorane før hadde.

Fordeling
På Leiknes skule skulle rektor etter den gamle modellen bruka 13 prosent på undervisning, mot no 50 prosent. Tilsvarande for dei andre skulane er: Eikanger: Før 30 prosent, no 65 prosent, Kløvheim før 30 prosent, no 65 prosent, Myking før 35 prosent, no 65 prosent, Skodvin før 25 prosent, no 70 prosent, Seim før 0 prosent, no 50 prosent og Festo før 50 prosent, no 70 prosent.

Små innsparingar
Rådmannen skriv i saksutgreiinga at den nye modellen gjev små innsparingar, men skal gjera administrasjonen meir effektiv, og at kvaliteten på skulane skal verta betre.
I framlegget til vedtak heiter det vidare at rådmannen får fullmakt til å sjå til at administrasjonen til ei kvar tid er tilpassa dei utfordringane kommunen står framfor.


? Ikkje nok tid til å leia skulane

?  Me er ikkje nøgde med den nye modellen som rådmannen lanserer. Det er positivt at dei små skulane skal ha eigen rektor, men det vert ikkje noko tid til å ta seg av leiinga av skulane, seier Laila Rydland i Utdanningsforbundet i Lindås til Strilen.
Ho viser til at dei lokale rektorane vil ha langt mindre tid til å ta seg av administrasjonen på skulane sine sidan dei skal undervisa mykje meir enn før.

Dobbeltarbeid
? Men skal ikkje einingsleiaren ta seg av dette?
? Nei, det vil ikkje fungera. Mykje av dette er oppgåver som etter lova må løysast på kvar skule, og me trur den modellen som no vert skissert, vil føra til mykje dobbeltarbeid, seier Rydland.
Rydland meiner alle skulane i kommunen har fått mindre ressursar til administrasjon, og at dette er noko som merkast alt no. Difor ønskjer Utdanningsforbundet at ein skal tilbake til å ha rektorar på alle skulane, også dei store skulane som no har fått felles rektor, som barne- og ungdomsskulen i Knarvik.

Skulekontor
? Me er heilt usamde med rådmannen i at den nye modellen vil føra til ein betre skule i Lindås, seier Rydland.
Elles meiner Utdanningsforbundet at det er viktig å ha ei god kommunal leiing når det gjeld skule, og ein måte å gjera det på, er å oppretta skulekontor igjen i kommunen. Det vart lagt ned for fleire år sidan.