Lovar å rydda opp på Risnes

Avskilta bilar og utrangerte fryseboksar står plassert ved Masfjorden Elektro sitt anlegg like ved kaien på Risnes. Vegen ned til huset er stengd med ein treport, og på porten er det montert overvakingskamera.

Strilen har vorte kontakta av folk som tykkjer rotet tek seg dårleg ut like ved kaien, som er del av kommunen sin tusenårsstad.

Må rydda
Avisa har også vore i kontakt med rådmann Svein Helge Hof­lunds­engen, som nyleg var på synfaring.

– Det stemmer at det er for mykje rot rundt bygget, men me håpar på dialog med leiinga i verksemda for å få dei til å rydda opp, seier han.

For nokre år sidan vart verk­semda truga med dagbøter viss ikkje skrot vart fjerna. Då vart det betre ei stund.

Skal rydda
– Det stemmer at det står litt forskjellig langs vegen, men ting skal verta betre, seier Vigleik Daae til Strilen.

Dei avskilta bilane skal regi­strerast på nytt, og utrangerte kvitevarer skal fjernast.

– Men det er ikkje alltid like lett å halda orden, fordi folk set frå seg gamle kjøleskåp og liknande utanfor her. Me sender dei til resirkulering, men me må samla opp slik at me har eit trailerlass, elles vert det alt for dyrt, påpeikar Daae.

Han forstår at folk ikkje likar å sjå utrangerte kvitevarer langs vegen.

– Men litt slikt trur eg ein vil finna utanfor dei fleste butikkar som sel slike varer, seier han.