Lovar jobb i løpet av ei veke

? Næringslivet i distriktet har eit stort behov for fagfolk, og ungdom med dei rette kvalifikasjonen skal eg kunna skaffa jobb på ei veke, lova Lars Hellandsjø på møtet for utflytt Gulen-ungdom. Då tenkjer industrileiaren og industrilagsleiaren på Gulen og Nordhordland sett under eitt. Berre blant verksemdene i Sløvåg er det stor mangel på folk i mange faggrupper.
Wergeland-konsernet åleine  har trong for prosjektleiarar, ingeniørar, fagarbeidar i betong, mekanikarar, sveisarar, salsmedarbeidarar og meir til.

Størst vekst
? Eg meiner Nordhordland og søre del av Gulen vil få den største veksten i heile Vestlandsregionen i åra framover, seier Hellandsjø.
Då tenkjer han både på alle aktivitetane rundt bygging av kraftvarmeverket på Mongstad, men og på verksemder som kjem i kjølvatnet av gassleidningen som kjem til Mongstad, med avgreining til Sløvåg. I Sløvåg vil leidningen gje grunnlag for eit LNG-anlegg som vil medføra ein god del arbeidsplassar.

Ein marknad
Hellandsjø meiner Nordhordland og Gulen er ein arbeidsmarknad. Det er difor ikkje noko i vegen for å bu i Gulen og jobba på sørsida av Fensfjorden. For unge som vil flytta heim att til Gulen, bør det vera den rette tida no. Og ut frå frammøtet på møtet i Bergen, skulle sjansane vera gode.
? Eg vart positivt overraska, og etterpå snakka eg med andre som kunne tenkt seg å ha vore der, men som ikkje hadde høve til å møta, seier Hellandsjø.