Lovlegkontroll av skulevedtak

? Det står i lova at borna skal gå på den skule som er nærast. Eg har målt avstanden fleire stader i Leiknesskrinsen, og alle stader er det kortare til Knarvik enn til Ostereidet, sa Svein Børtveit då kommunestyret skulle fastselja opptaksgrenser for skulane i kommunen.
Børtveit meinte Leiknes-elevane vert behandla som fugleungane i eit reir der det kjem ein gaukunge. Dei vert sparka ut.

Lovlegkontroll
Børtveit varsla at han ville krevja lovlegkontroll viss fleirtalet gjekk inn for å flytta elevane til Ostereidet frå neste haust. Berre to røysta mot å flytta elevane, og då sa Høgre-gruppa og frå om at dei ville vera med på kravet om lovlegkontroll.
Dermed er det mange nok, og saka vert send til Fylkesmannen for avgjerd. Men rådmann Øistein Søvik meinte at andre avgjerder i liknande saker tala mot at dei som krev kontroll, vil få medhald.

Ein skule
Høgre ville ikkje at ungdomsskuleelevane i Alversund skal flyttast til Knarvik. May Eva Sandvik viste til at det er usikkert når den nye ungdomsskulen i Knarvik kan stå ferdig, og at det dermed kan verta mange mellombelse løysingar i Knarvik for å få plass til alle elevane. Høgre ville heller at det skal byggjast ein mellombels paviljong i Alversund, men berre Høgre-gruppa gjekk inn for dette.
På spørsmål svara assisterande rådmann Kåre Jordal at ein tok sikte på å setja i verk overflytting frå neste haust. Men han kunne ikkje lova at ungdomsskulen står klar før våren 2009.

Ja til stor barnehage i Juvikstølen
Det skal byggjast ein ny barnehage med inntil 135 plassar i Juvikstølen i Knarvik. Det vedtok kommunestyret i Lindås torsdag. Men både Høgre, Framstegspar-tiet og Venstre tykte denne barnehagen vert for stor og gjekk inn for ein barnehage med 90 plassar.
? Eg fryktar kaos i gymnaskrysset når alle foreldra skal levera borna sine der. Det er vanskelege trafikktilhøve alt no, sa May Eva Sandvik (H).
Ho meinte og at kommunen har så mange investeringsoppgåver at den største barnehagen vert for dyr å byggja.

Delt opp
Rådmann Øistein Søvik kunne opplysa at den planlagde barnehagen skal vera i fleire avdelingar, som vil liggja skilde i terrenget og med kvar sitt uteareal. Han meinte difor at barnehagen ikkje ville verka så stor for borna.
Ved å byggja ein stor barnehage kan ein avlasta både Haugen barnehage og behovet i Alversund, sa han.
Eit klart fleirtal gjekk inn for det største alternativet, som vart vedteke mot elleve røyster.

Ikkje tidfesta
Kommunestyret vedtok og at Lindås skal ha full barnehagedekning, men sa ikkje når. Tore Svendsen ville ha inn at full barnehagedekning skal vera klar til 2009, men det gjekk fleirtalet mot. Eit lite poeng er at Svendsen, som representerer SV, gjekk inn for ein frist som ligg etter det partiet sentralt har lova. Kristin Halvorsen har sagt at ho trekkjer seg som finansminister viss ikkje det er full barnehagedekning her i landet innan utgangen av neste år.
Kommunestyret vedtok og at det skal vera minst ein kommunal barnehage i alle dei fire ungdomsskulekrinsane i kommunen

Tvert nei til sal
til Western Geco
Lindås kommune vil ikkje selja arealet der Haugen barnehage ligg i dag til Western Geco.
Det vart utfallet då saka var oppe i kommunestyret torsdag. Vedtaket om å seia nei til sal var samrøystes.
Grunngjevinga er at det vert for dyrt å byggja ny barnehage til erstatning for den som ville forsvinna viss området vart selt. Haugen barnehage har fem avdelingar og er den største barnehagen i Knarvik.
? Me har ikkje diskutert kva avslaget inneber, seier Jan Yngve Kvamme hos Western Geco til Strilen.
Verksemda hadde tenkt å bruka arealet til parkering og av- og pålasting på trailerar. I dag har verksemda svært lite plass til dette.