Løypetoni klar for sal sommaren 2008

Til no har selskapet her i Bergen satsa mest i omegnskommunane Os, Askøy og til dels på Sotra i tillegg til Bergen. No ser me eit grunnlag for å satsa også i Nordhordland, og Løypetoni er eit attraktivt område som me har har vore på jakt etter i eit par år. Difor valde me å kjøpa det då det vart lagt ut for sal i fjor haust, seier akvisisjonssjef GunnarGrytaas i Byggholt A/S i Bergen. Han har ansvaret for å sikra selskapet nye areal for bustadbygging i Bergens-området.
Det var eit bod på nær 24 millionar kroner som sikra firmaet den kring 90 mål store eigedomen, ein tidlegare gardseigedom.
? Fleire aktørar var med i bodkampen. Prisen me enda på, var innafor den ramma me hadde sett på førehand, seier Grytaas.

Får tre framlegg
Byggholt er norsk aksjeselskap eigd av det store svenske konsernet JM, som sel bustader for kring åtte milliardar kroner per år i Skandinavia. Den norske delen av selskapet ligg for tida på kring 1,2 milliardar kroner i årsomsetning
Etter kommuneplanen kan vel 50 mål av Løypetoni brukast til bustadutbygging.
? Fristen for å koma med merknader til oppstart av reguleringsarbeidet går ut denne veka. Parallelt med dette har me bede tre arkitektfirma i Bergen om framlegg til utbygging av området. Me betalar alle tre for jobben, slik at me står fritt til å velja litt frå kvar om me ønskjer det, seier Grytaas.

Salsstart i 2008
Grytaas gjer det klart at han ikkje ser for seg høghus i Løypetoni.
? Me går ut frå 120-140 bueiningar i ei blanding av einebustader, rekkjehus og leilegheiter, seier Grytaa. Tilseier marknaden høgare etterspurnad etter leilegheiter, kan det verta lagt opp til det. Grytaas har notert seg at andre utbyggjarar på Frekhaug har auka talet på mindre leilegheiter.
Grytaas viser elles til at noko av terrenget er bratt og kan eigna seg for terasseblokker.
Byggholt A/S byggjer og sel ferdige husvære. Går arbeidet med prosjektet etter planen, vil selskapet ha dei første klare for sal frå sommaren 2008.