Luftambulanse henta turgåar

Ei dame som glei på det sleipe føret og skada seg i høgre foten, måtte ha assistanse.

Uhellet skjedde 50-60 meter frå hytta på Totlandsfjellet i halv tolv-tida, på stien ned mot Eknes. Luftambulansen var på plass ca. kl. 12.15 og fekk sett av lege like ved hytta. Etter å ha ytt førstehjelp, fekk han med hjelp av andre turgåarar bringa dama i posisjon til å verta henta av luftambulansen.

– Det var imponerande å sjå kor effektivt mannskapet fekk styrt luftambulansen i posisjon til å henta den skadde i det ulende terrenget like ved hytta, seier Stanley Hauge, som tilfeldigvis var på tur i området.

Sjølv om det no har vore nokre dagar med opphaldsvêr, og turløypene er tørrare enn dei har vore på eit par månader, er det sleipt mange stader i løypene.

– Så ver påpasseleg og forsiktig når du er ute i skog og mark, særleg når du går unnabakke, seier Hauge.