Lyngheisenteret får sletta gjelda

Eit samrøystes fylkesting vedtok på Stord i går å sletta heile gjelda på 18,6 millionar kroner som Lyngheisenteret på Lygra har til fylkeskommunen. Dermed er ei økonomisk hindring for at Lyngheisenteret kan koma inn på årlege løyvingar over statsbudsjettet, borte.
? Dette var eg ikkje klar over, men det var ei svært gledeleg melding, seier styreleiar Jostein Vike i Stiftinga Lyngheisenteret til Strilen.

Gode sjansar
Det økonomiske stoda til Lyngheisenteret har dei siste åra vore så vanskeleg at ein har måtta driva senteret på eit minimumsnivå.
? Med dette vedtaket trur eg det er store sjansar for at me alt frå neste år kan koma inn på årlege løyvingar via statsbudsjettet, seier Vike.
Slike løyvingar vil kunna føra til at drifta av senteret igjen kan trappast opp.
Vike vil gje honnør til fylkesrådmann Paul M. Nilsen, som han heile tida meiner har vore innstilt på å finna ei løysing for Lyngheisenteret.

Museumssenter
Bakgrunnen for fylkestinget sitt vedtak er at styret i Stiftinga Lyngheisenteret har godkjent ein avtale om å verta ein del av konsolideringsprosessen i museumssektoren i Nordhordland. Dei går inn i den konsoliderte eininga saman med mellom andre Museumssenteret i Salhus.
Lyngheisenteret er enno ikkje heilt gjeldfritt, men det er snakk om mindre postar som Vike er sikker på ein og skal finna ei løysing for.