Lysø takkar av

– Eg har ein ekstra blomst, og den går til kona Magnhild. Utan ho hadde eg aldri kunne vore så mykje heimanfrå som eg har vore, sa Ole Lysø i ei av dei siste helsingane fredag.

Før det fekk han KS-medalje og gåver, og retta ei takk til medfolkevalde for mangeårig samarbeid.

For denne kvelden på Austrheim Samfunnshus, der det sitjande kommunestyret hadde avslutning etter fire år, var ekstra historisk. Det vart «ein siste kveld med gjengen» når ein av Nordhordland sine mest markerte politikarar takkar av – etter 44 år i lokalpolitikken.

Myndig hand
– Du har styrt formannskapet med myndig hand. Diskusjonane har vore mange og stundom harde, men eg synest formannskapet har fått gjort svært mykje for innbyggjarane i Austrheim, sa Sognnes då han bad Lysø koma fram og få KS-medaljen.

Akkurat den avgjerda fekk ikkje Lysø vera med på. Han vart jaga på gongen då formannskapet 8. juni vedtok å søkja om tildeling av heidersteiknet. Medaljen går til personar som «har utført ei fortenestefull samfunnsgagnleg verksemd av særleg betydning» for sin kommune.

– I tillegg meiner eg at ditt sterke engasjement, kreativitet, ståpåvilje og ukuelege optimisme, viser at du fyller bestemmelsane i vedtektene og vel så det, sa varaordførar Harald Sognnes då han delte ut medaljen.

Glad for utmerkinga
– Tusen takk. No forstår eg kvifor eg vart jaga på gongen! sa Ole Lysø i sin takketale. Han sa at han ein gong vart spurd om han ikkje skulle få KS-medaljen.

– Kor tid får ein sveisar KS-medaljen? spurde eg tilbake.

Samstundes sa Lysø seg veldig glad for utmerkinga.
– Dei kan berre prøva seg i lokalpolitikken dei som vil. Det er ein nokså tøff jobb, sa Lysø.

Fleire som helsa, kom inn på at Lysø hadde imponert dei med gode kunnskapar på mange felt, sjølv om han rekna seg som «berre ein vanleg sveisar».