Må fjerna fire tiltak eller få bot

Det som må fjernast, er ein steinkai, delar av eit anneks, tak over ein båtgarasje og ei flytebryggje.

Er ikkje dette ordna innan 15. april, må eigaren ut med 25.000 kroner i eingongsbot, og ei dagmulkt på 250 kroner dagen inntil opprettinga er utført.

Avgjerda vart teken like før jul, i ei klagesak Lindås kommune sende frå seg i slutten av mai i fjor. Fylkesmannen beklagar den lange saksbehandlingstida.

Snillare enn kommunen
«Dommen» som Fylkesmannen har kome fram til, er litt mildare enn politikarane i Lindås gjekk inn for etter å ha vore på synfaring. Eigaren slepp i første omgang å fjerna trappa ned mot sjøen mot vest, og både ein støtte­mur og blokkstein lagt i sjøen får vera i fred.

Lindås sine folk på byggesak hadde to synfaringar på eige­domen før det vart reist sak. Dei kom i første omgang til at det var ni ulovlege tiltak.

Godt nok rettleia
Det er frå denne lista Fylkesman­nen no har trekt ut tre inngrep der kommunen blant anna må gjera nye vurderingar. Fylkesmannen sine folk har tatt avgjerda utan å ha vore på eige­domen og sett med eigne auge.

Klagaren meiner kommunen ikkje har rettleia godt nok om kva det trong søkjast om. Den påstanden er avvist av Fylkesmannen.