Må i fengsel for avfalls-dumping

Lasset med avfall som vart dumpa, inneheld både bildelar, takplater, sikringsskap og anna skrot. Mannen som i Bergen tingrett er dømd for avfallsdumpinga, er no busett i Danmark, men var tidlegare heimehøyrande i Bergen. Han har vedgått at det var han som ved midnatt 14. april i fjor køyrde lasset med avfall ut på ein sideveg like ved E 39 på Andås og dumpa lasta rett utfor vegen. For å koma ut på sidevegen måtte han fjerna eit betongelement som stod som sperre.

Avfallet ligg framleis på Andås, godt synleg frå europavegen når det ikkje er lauv på trea.

Nitti dagar

Mannen var tiltalt for fleire tiltalepunkt i saka. Han vart tiltalt for eit liknande tilfelle av avfallsdumping på ein rasteplass ved E 39 på Furnestræet i Vaksdal kommune. I tillegg var han tiltalt for promillekøyring. Retten fann han skuldig på alle punkt og dømde han til fengsel i nitti dagar. I tillegg må han betala ei bot på 10.000 kroner til statskassa.

Mannen vart også frådømd retten til å køyra bil for alltid.

Ikkje fjerna

I retten tilbaud tiltalte seg å rydda opp i skrotet på Andås. Men sidan skrotet har lege der i halvanna år utan at noko er gjort, fann ikkje retten å festa lit til det. I staden vart grunneigar tilkjent 3745 kroner i erstatning for å rydda opp sjølv. Dette tilsvarar summen Statens vegvesen fekk i erstatning for oppryddinga på rasteplassen i Vaksdal.

Ikkje inndra

Aktor hadde lagt med påstand om at grunneigaren på Andås skulle ha 10.000 kroner for å rydda opp, men retten ville altså ikkje gå så høgt.