Må kutta millionar

–Eg synest det er oppsiktsvekkjande at statsråden ikkje tek ansvar. Dette betyr at Meland kommune vert ein kasteball mellom Fylkesmannen og Kommunaldepartementet.

Det seier ordførar Nils Marton Aadland etter at Liv Signe Navarsete sitt departe­ment «ikkje finn det nødvendig å ha møte» med Meland kommune om bruk av utbytte frå BKK. Det var nemleg svaret kommunen fekk tysdag, etter å ha tatt opp problemet med at Meland, og andre kommunar, ikkje har eit godkjend budsjett for 2011.

Vart «Svarteper»
Meland fekk, som Bergen kommune, grønt lys for å bruka ekstrautbytte frå BKK  i drifta.

Seinare klaga opposisjonen i Bergen på dette med påstand om at utbyttet berre kunne brukast til investeringar. Det har Kommunaldepartementet konkludert med er rett. At Meland betalar ned gjeld, er å bruka BKK-utbyttet som driftsinntekter, i staden for å putta pengane inn i nye investeringar. 

Dermed sit Meland att med  «Svarteper», eit ugyldig budsjett som ikkje er i balanse.

– Me held oss til pålegg frå Fylkesmannen om å betala ned underskot, som viste seg å vera feil. Departementet visste konsekvensane for oss. Då hadde me forventa at departementet ville inngå ein dialog, seier Aadland.

– Råkar innbyggjarane
At BKK-utbyttet må gå til investeringar, svekkar både rekneskap for 2010 og drifta i 2011.

No pådreg ein seg truleg ein auka minus i 2011 og vert ikkje ferdig med oppsamla underskot neste år.

– I staden må me kutta opp til 7,7 millionar. Innbyggjarane  vil merka eit redusert tilbod i tenestene, ein konsekvens av departementet si avgjerd, seier Aadland. Meland møter i dag Fylkesmannen på nytt.

– Me vil i alle høve gjera alt som er mogleg for å betra situasjonen, seier Aadland.

BKK-utbytet kan gå til å redusera låneopptak til investeringar. Dette gjev kommunen ein viss reduksjonen i drifta, men på langt nær dei summane ein må ta inn gjennom kutt.