Må venta på ubåt-pengar

Kystverket har fått 35 millionar kroner til rådvelde til vidare førebuingsarbeid i år, skriv Hordaland fylkeskommune i ei pressemelding.

? Nei, det er ikkje rett. Kystverket har bede om 31 millionar, men pengane er ikkje gjeve, seier ekspedisjonssjef Kirsten Ullbæk Selvig i Fiskeridepartementet.

Fylkesordførar Torill Selsvold Nyborg og Fedje-ordførar Erling Walderhaug var tysdag i møte med departementet om ubåt-saka. I ei oppsummering av møtet skriv fylkeskommunen at 35 millionar kroner er på plass. Men det vil i beste fall ta eit par veker før departementet avgjer om Kystverket skal få ein slik sum.

? Det kan gå ei stund, seier Ullbæk Selvig.

? Då har eg oppfatta det feil. Det var bra at me fekk klara opp i dette, seier fylkesordføraren når Strilen opplyser at pengane ikkje er løyvd.

Kystverket har bede om pengar for å granska vraket nærare. Den tyske ubåten hadde truleg opp mot 70 tonn kvikksølv om bord. Spørsmålet er om dette ekstremt miljøfarlege stoffet skal hevast eller dekkjast til. Kystverket vil finna ut av dette i sommar, og så gjera noko med problemet i 2007. Dette har Fedje kommune og fylkeskommunen protestert kraftig på, dei vil ha kvikksølvet opp av botnen alt i år. Det fekk dei ikkje gjennomslag for i møtet med Fiskeridepartementet.

? Det mest trulege er nok at det skjer i 2007. Me ville helst hatt kvikksølvet opp alt i morgon. Men det er vanskeleg å seia at Kystverket tek feil når dei seier det trengst meir tid, seier Fedje-ordføraren.

Han synest dei møtte stor forståing for synspunkta sine i møtet med departementet.

Det skal opprettast ei prosjektgruppe for ubåtvraket, og Fedje ønskjer å få ein representant med i denne gruppa.