Mange lokale med i Which Witch

Dei skal vera disponible frå klokka ti om føremiddagen til klokka er ti om kvelden, men Whitch Witch-gjengen på Håkonshaugen har ingen problem med dei lange arbeidsdagane. Strilen har tatt ein prat med to av dei ni lokale deltakarane for å få ein smakebit på livet i Which Witch-leiren.

Trivst godt
? Det er veldig kjekt. Alt er veldig bra, skikkeleg profesjonelt gjennomført frå start til slutt, seier Preben Hodneland, og får støtte frå Marit Drivenes.
Om under ein månad står dei lokale utøvarane på scena på Håkonshaugen framfor publikum for første gong.
? Me gler oss. Det vert garantert veldig bra, lovar dei to.
Ingen av dei to hadde noko nært forhold til hekser før dei enda opp som songarar og skodespelarar i Which Witch.
No som prøvene er godt i gang, har dei verkeleg fått smaken for musikalen. Begge har fleire forskjellige små roller. Preben skal mellom anna vera fangevaktar, medan Marit er heks.

God stemning
Stemninga i Which Witch-leiren er god.
? Det er veldig mange kjekke folk her. Me får ein fin sjanse til å verta kjent med folk frå store delar av landet. Dessutan er det moro å møta kjente personar, seier dei i det Rein Alexander går forbi på veg til scena og kikkar strengt på dei to.
? No må det berre sjå å oppføra dykk fint, seier han morsk.
? Ja, ja, ja... Rein er utruleg dyktig, seier Preben Hodneland så høgt at «halve» Seim høyrer han.
Rein Alexander smiler lurt og legg i veg for å øva på rolla som Anton Függer, medan dei som står att humrar og ler.  

Gler seg til premiere
Den første veka var omlag 50 personar med på prøvane på Håkonshaugen.
Etter kvart som det nærmar seg premieredatoen kjem fleire og fleire til. Livet i Which Witch-leiren er veldig sosialt. I tillegg til øvinga vert det også lagt opp til ein del sosiale aktivitetar, blant anna grilling og bading.
? Maten er god, den må me få lov å skryta litt av. Me får faktisk to varme måltid om dagen, seier dei.
? Men er de ikkje redd for å veksa ut av kostyma då, visst de et så mykje?
? Å nei då, det er no grenser for kor mykje me klarar å leggja på oss på ein månad. Kostyma er heilt supre dei. Dei passar heilt perfekt, seier dei og fortel at dei nesten ikkje kan venta til premieren.