Mange minnast Eirin (15)

Eirin Markhus døydde laurdag ettermiddag av skadane ho fekk då ho vart påkøyrd på riksvegen ved Frekhaug senter torsdag kveld. Ho fylte 15 år den dagen ulukka skjedde.

Verdig minnestund
Meland Ungdomsskule vart opna for vener og medelevar frå klokka 19 laurdagskvelden, fortel lensmann Einar Vatne.
? Det var ei minnestund der i ni-tida om kvelden, og ungdomane fekk informasjon om kva som hadde skjedd. Deretter gjekk me samla opp til ulukkesstaden, der det var ei markering med tenning av lys og nedlegging av blomar. Prest Rune Minde sa også nokre ord på staden, seier Vatne.
Vegen vart stengt i ein god halvtime under markeringa. Vatne seier det var ei flott og verdig minnestund. Søndag var det samling i bedehuset.
Det vert gravferd frå Meland kyrkje fredag klokka 12.00, fortel lensmannen.
Denne ulukka har prega både Frekhaug og store deler av Nordhordland dei siste dagane.
Som følgje av ulukka vart også fotballturneringa Bend It Cup, som skulle gå på Fossemyra søndag, avlyst. Vatne seier at politiet framleis etterforskar saka, og at dei enno ikkje har teke stilling til om den 22 år gamle føraren av bilen som køyrde på jenta kan klandrast for ulukka.

Vil rekna ut farten
Blant det dei etterforskar er kva fart bilen hadde i 60-sona. Det er tydelege bremsespor i vegbana, og det vert noko av grunnlaget når dei skal rekna ut farten på bilen.
Jenta vart påkjørt då ho saman med veninna skulle sykla over riksvegen ved overgangen mellom krysset til Frekhaug og krysset til vegen opp til Fossemyra.
Veninna som sykla saman med den omkomne, kom frå ulukka med lettare skadar.
Ulukka skjedde i åtte-tida om kvelden, og 15-åringen vart frakta til Haukeland Universitetssjukehus med Luftambulansen. Sjukehuset opplyste lenge at tilstanden til jenta var kritisk og ustabil. Laurdag ettermiddag vart ho erklært død.
Bilen køyrde langs riksvegen frå vest i retning mot krysset ved Frekhaug.
Dei to jentene kom syklande nedover vegen som går frå Fossemyra, og skulle kryssa vegen der det er opning i midtrabatten og i autovernet på begge sider. Jenta vart då påkøyrd.