Manger og Sæbø kan få landskapsparkar

Det eine området er gardane Tolleshaug, Olsvoll og Solheim på Sæbø, som i 2003 fekk fylket sin kulturlandskapspris. Det andre området er kommunen sin tusenårsstad frå Morken og Nøttveit og opp på Nøttveitveten.

Tolv kommunar
I alt tolv kommunar hadde søkt om å få vera med i prosjektet, men berre seks vart denne veka plukka ut.
Av dei som fekk avslag, er Kvalvågneset i Lindås og Ypso i Meland.
Når no Radøy er vald ut til å vera med, skal det setjast ned ei styringsgruppe for prosjektet.
Skapa næring
? Målet med prosjektet er at ein skal skapa næringsverksemd med utgangspunkt i kulturlandskapet, seier jordbrukssjef Øyvind Thømt i Radøy kommune til Strilen.
Næringsverksemda kan vera alt frå matservering og sal av lokalproduserte matvarer til guida turar og overnatting.
For å leggja til rette for meir aktivitet kan det vera aktuelt med rydding av skog og kratt, opparbeiding og skilting av turstiar og restaurering av gardflorar og steingardar.
For å skaffa overnattingsplassar kan istandsetjing av gamle gardshus vera eitt alternativ.

Samarbeid
Men det er ikkje berre grunneigarane som skal vera med i prosjektet. Lokale overnattingsverksemder, som Smiths Pensjonat og Hella skulestove, kan vera samarbeidspartnarar. Det same er Radøy ridesenter på Morken og Tjore  gardsmat på Sæbø.
Prosjektet skal gå over tre år, og det vil verta gjeve tilskot til dei ulike prosjekta. Men kor mykje pengar dei vil få, er ikkje avklart. Kommunen må også gå inn med litt pengar, og i tillegg vert det satsa på eigeninnsats. I prosjektskissa for Radøy vert det operert med årlege utgifter på 360.000 kroner.
Forskarar frå Rokkansenteret ved Universitetet i Bergen og Aurland Naturverkstad i Sogn skal hjelpa til med råd og rettleiing.
Prosjektet er finansiert med midlar frå fylkeskommunen, Innovasjon Noreg, Fylkesmannen og kommunane som er med i prosjektet.