Manger kjører i Rally Bergen

Siste finpuss på bilen er unnagjort, slik at alt skal liggja til rette for å forbetra sjuandeplassen frå Rally Bergen i fjor.
? Eg har sett på større bremser, og fått på fjører som er betre tilpassa asfalt, seier Arne Manger.
Manger og kartlesar Svein Petter Silseth har kjørt dei fem av årets sju NM-rundar som så langt er arrangerte. Dei fleste NM-rundane går på grusvegar, og laurdagens asfaltløp krev endringar både på bilen og kjørestilen.
? Rally Bergen er ikkje eit NM-løp, men eg må vera med der sidan det er på heimebane. Og så er det fin opplading til NM-runden i Larvik, for den skal også gå på asfalt, seier Manger.
Dei to siste rundane i NM går i Larvik 9. september (asfalt) og i Hedmark 23. september (grus).

Skriva notar
Løpet på Osterøy går over ein lang etappe på sju kilometer, og to korte på kring to kilometer kvar. Alle etappane skal kjørast tre gonger. Løypa er mykje den same som i 2005, med unntak av at to etappar er slegne saman til ei lang. Og så har ein snudd kjøreretninga i den etappen der det i fjor var ei stygg utforkjøring.
? Svein Petter Silseth kjem over frå Austlandet med fly i fredag, og så skal me ut på Osterøy for å skriva notar, seier Manger.
Løypa vert ikkje stengt i samband med gjennomkjøringa, slik at denne må gjerast i 50 kilometer i timen slik fartsgrensa er på staden. Då er utfordringa å sjå for seg korleis det same strekket ser ut når ein kjem susande i det doble eller meir.
? På det raskaste kan me nok koma opp i 170-180 kilometer i timen. Då må ein kunna stola på sidemannen med kartet, og på det som vart notert under gjennomkjøringa i 50 kilometer i timen.
Manger har kjørt tre sesongar med Svein Petter Silseth som kartlesar, den første i ein eigen Nissan Almera-cup, og dei to siste i rally etter at Mitsubishien vart kjøpt. Etter at Manger sin første kartlesar måtte gje opp grunna bilsjuke, måtte radværingen til Bærum for å finna ein ny sidemann.
? Han som Silseth kjørte med før, knuste bilen og skulle gje seg. Me kjørte eit løp saman, og det fungerte bra, fortel han om det snart tre år lange samarbeidet.

Siktar mot VM-runden
Så langt i år har Manger/Silseth ein sjetteplass og to sjuandeplassar som sine beste plasseringar i NM, det gjev ein niandeplass totalt. Målsettinga før sesongen var å koma mellom dei ti beste, men sidan det har gått bra til no vonar Manger at dei kan klatra ytterlegare på dei to siste NM-rundane.
? Neste år satsar me på å vera med i VM-runden som skal arrangerast i Hedmark, seier Manger.
Rally Norway var i år ein NM-runde, neste år vert det ein WRC-runde der Petter Solberg og dei andre store er på startstreken.

Skrur sjølv
Mellom løpa gjer Manger sjølv unna all skruinga på bilen, så det vert nokre timar i garasjen for radværingen. Til dagleg arbeider han som industrimekanikar hjå Frank Mohn Flatøy, og i tillegg har han nyleg også teke over heimegarden.
? Eg får god hjelp av foreldra mine, elles hadde eg ikkje klart dette, seier Manger om korleis ein kan kjøra NM-rundar i rally samstundes som det skal verta tid til arbeid, fjøsstell og grashausting.
Dersom det vert kjøring i WRC-runden i Hedmark i 2007 vil nok Manger møta team med litt fleire på lønningslista.
? Det vert nok dyrt å vera med der borte, så det hadde ikkje akkurat gjort noko med fleire sponsorar. Med tre dagar med kjøring går det vel 20.000 kroner berre i bensin, og like mykje i påmeldingsavgift, seier Arne Manger.
Rallybensinen på 102 oktan kostar 40 kroner literen, og med full gass går det sju liter på mila.

www.rallybergen.no
Kjørarane i Rally Bergen laurdag vil starta frå Valestrandsfossen kring klokka 13.00, for å kjøra til start på den første fartsprøva. Det vert kjøring fram til kring klokka 16.00.
Dei som vil til Osterøy for å sjå løpet kan finna meir info og løypekart på løpsarrangørane si heimeside på Internett, www.rallybergen.no.