Manger kyrkje vert stengd i tre månader

Manger kyrkje vert frå tysdag i neste veke stengd fram til 10. desember. I denne perioden skal arealet under galleriet byggjast inn. På eine sida av midtgangen vert det toalett for funksjonshemma og stellerom for dåpsborna. På andre sida kjem eit nytt laget.

Rømingsvegar
Kyrkja skal og få utvida rømingsvegar.
? Dørene framme i koret skal utvidast frå 70 til 90 centimeter breidde. Det har vore ein omstendeleg prosess for å få dette godkjent, men til slutt greip biskopen inn, fortel kyrkjeverje Meinert Helland til Strilen.
Når ein får nytt lager, kan ein også rydda bort ting som står lagra i eine trappa opp til galleriet no. Det gjer at ein på nytt kan ta plassane på galleriet i bruk.
? Sjølv om me misser nokre benker bakerst i kyrkja, vil me kunna ta fleire folk inn i kyrkja enn no fordi rømingsvegane vert utvida, seier Helland.
Totalt vert det plass til rundt 400.
Det skal også utførast fleire utbetringar inne i kyrkja. Det skal koma rampe for rullestol opp i koret, og trappa opp i koret skal flyttast litt. Golvet skal slipast ned og deler av kyrkja skal malast opp att.
? Totalt er det snakk om ei utbetring til 1,3 millionar kroner, fortel Helland.

Sæbø og Hordabø
I den tida kyrkja på Manger er stengd, vil det vera fleire gudstenester i Hordabø og Sæbø kyrkjer.
Gravferdene vil også gå føre seg i desse kyrkjene, men gravplassen ved Manger-kyrkja vil  vera i bruk som normalt sjølv om kyrkja er stengt.