Manger Seafood kjøpt opp av ­Lofotprodukt AS

Dermed vert det slutt på fiskematproduksjonen på Manger, som Hans Henrik Fanebust starta opp tilbake i 1967. I dag er det sonen Rune Fanebust som driv selskapet.

– Alle tilsette i produksjonsavdelinga hjå Manger Seafood AS får tilbod om å jobba ved Lofotprodukt sin fabrikk i Godvik, heiter det i ei pressemelding som er sendt ut i samband med oppkjøpet.

Dette overføringstilbodet gjeld ikkje dei fire sjåførane, sidan distribusjonen heretter vil gå via grossist og ikkje direkte til butikk.

Dei tilsette på Manger vart varsla om oppkjøpet og flyttinga i går. I alt er det kring femten årsverk i verksemda på Manger.

Flyttinga finn stad innan 1. september.

Madam Bergen
Lofotprodukt AS overtok merkenamnet Madam Bergen i 2009, og har sidan drive i ein ny og moderne fabrikk i Godvik. No skal også produksjonen under merkenamnet Manger Seafood finna stad der, etter at familien Fanebust har selt alle aksjane i Manger Seafood AS til selskapet Lofotprodukt AS.

Sistnemnde er eit større selskap, med kring hundre tilsette, og fabrikk både på Leknes i Lofoten og i Godvik, Bergen.

Sidan 2006
Manger Seafood AS driv med produksjon og sal av fiskemat til daglegvare- og storhushaldningsmarknaden på Vestlandet. Produksjonen under dette merkenamnet starta opp att i 2006, og tok over etter at produksjonen under namnet Manger Fiskemat vart flytta vekk frå Radøy. Iglo Manger AS kjøpte Manger Fiskemat i 2000, og dreiv så på Manger fram til september 2005. Etter dette var det stopp eit halvår, før Manger Seafood-namnet vart teke i bruk for den nye produksjonen.

Oppskrifter og produksjonsmetodar for Manger-produkta skal ikkje endrast i samband med den siste overtakinga, og Rune Fanebust, dagleg leiar i Manger Seafood AS, er tilsett som kundekonsulent i Lofotprodukt AS med spesielt ansvar for Manger- produkta.

Ny aktivitet
Saman med faren og søstera eig Rune Fanbust framleis lokala på kaien på Manger, og han håpar at dei på sikt vil få til ny aktivitet der.

– Først må me kjøra denne flytteprosessen ferdig og ta vare på dei som skal takast vare på. Men på sikt er det klart at me håpar å få inn ny aktivitet som gjev arbeidsplassar, seier Rune Fanebust.

Bygningane som no vert ledige er to store betongbygg med god takhøgde, og eigen kai rett utom døra.

- Her må det vera gode moglegheiter, med både Sture og Mongstad like ved. Eg vonar at nokon ser moglegheitene her, seier Fanebust.

FAKTA:
Lofotprodukt AS:
- Etablert i 1994, med hovudkontor på Leknes i Lofoten. Fabrikkar på Leknes og i Godvik i Bergen, samt sals- og marknadsavdeling i Oslo.
- Omsetnad 2010: ca 175 millionar.

Manger Seafood AS:
- Vidareføring av lokal produksjon, som starta på Manger i 2006.
- Ligg på Manger i Radøy kommune.
- Omsetnad 2010: ca 20 millionar.