Manglande lykt kan kosta dyrt

? No må de skriva noko om alle som ikkje refleks, og alle som ikkje har lykt på sykkelen. Nyleg køyrde eg på vegen frå den nye idrettshallen på Fossemyra og ned til hovudvegen på Frekhaug. Der var masse born ute på kveldstid, og nesten ingen hadde refleks på seg. Av dei som sykla, såg eg berre ein som hadde lykt. Dette er svært trafikkfarleg, seier ei kvinne som ringjer til Strilen.

Ho reknar med at etter den nye hallen opna, vert det mykje trafikk av gåande og syklande frå Fossemyra og ned til Frekhaug.

? Sjølv om der er gang- og sykkelveg, trur eg dei kjem til å bruka bilvegen, seier ho.

Passa på

? Å køyra utan lykt på sykkelen er både trafikkfarleg og ulovleg, seier politiførstebetjent Ove Hindenes ved Lindås og Meland lensmannskontor i ein kommentar.

Han understrekar at det er foreldra som må passa på at borna har sykkel i forskriftsmessig stand.

? No kostar det 900 kroner i bot viss du køyrer utan lykt på sykkelen. Bota vart auka frå 500 kroner i fjor, fortel Hindenes.

Utvaska

Når det gjeld refleks, gjer Hindenes merksam på at refleksvestar vert utslitne i vask, slik at refleksverknaden forsvinn.

? Der er nok mange som spring rundt med falsk tryggleik, seier han.

På grunn av ressurssituasjonen er det sjeldan det lokale politiet har høve til å ha kontrollar når det gjeld lykt og anna tryggingsutstyr på syklane, og Hindenes tvilar på at dei kjem til å ha nokon med det første, verken på Frekhaug elle andre stader. Men han påpeikar at dei som brukar sykkel, er pliktige å passa på dette sjølve.