Mann kom seg ut då hus brann ned

– Det var ein mann og ein hund i huset då det begynte å brenna, men dei kom seg ut, opplyser Jacob Hernar, vakthavande brannsjef i Lindås og Meland brannvern.

Ein bustad og tilhørande garasje på Veland vart totalskadde i brannen

Då alarmen gjekk hjå brannvesenet klokka 12:13 søndag ettermiddag gjekk meldinga på at flammane stod ut av glasa i bustaden.

– Me kom på staden klokka 12.39. Då var huset overtent, seier Hernar.

Brannmannskapar frå fire bilar fekk kontroll på brannen.

– Både huset og garasjen er totalskadde av brann. No vil me halda på med ettersløkking i nokre timar utover ettermiddagen, seier Hernar.

– Fæla smelling

Naboar samla seg i vegen nedanfor huset.

– Dette er utruleg ekkelt. Eg sat inne og hørte fæla smelling. Eg trudde det var nokon som skaut med gevær. Eg sprang ut og eg skvatt då eg såg eg den svarte røyken, seier Rannbjørg Veland, nabo til bustaden der det brann.

Mannen som redda seg ut av brannen vart frakta til legevakt for helsesjekk. Deretter vil politiet snakka med han.

Etterforskar årsaka

– Brannårsaka skal etterforskast, men det kan sjå ut til at brannen har starta fleire stader samtidig. Den har starta på høgre side av bustaden og venstre side av garasjen tilsynelatande samtidig. Dette er spesielt og må undersøkast vidare, seier politiførstebetjent Svein Atle Hatlevik.

Då brannvesenet og politiet kom til staden var det full fyr i skogen bak bustaden.

– Her er mykje skog og det ligger bustader langs heile skogkanten, så dette kunne vorte ein mykje verre situasjon. Heldigvis var skogen våt og me fekk tatt ut vatn frå elva like ved vegen, slik at brannen kunne sløkkjast, seier Hatlevik.