Mann pågripen og i avhøyr etter brann

Uthuset som det oppstod brann i, står like ved eit bustadhus, og både Lindås og Meland brannvern og politiet rykka ut.

– Brannen vart meldt sløkt klokka 05.39, melder Hordaland Politidistrikt.

Uthuset vart totalskadd, men ein ATV og ein plentraktor vart redda ut. Bebuarane i bustadhuset vart evakuerte.

Saka vert etterforska av Nordhordland lensmannsdistrikt, som har pågripe ein mann i 40-åra i samband med brannen.

– Mannen er tatt inn som mistenkt og sit no i avhøyr, seier Lars Geitle ved Nordhordland lensmannskontor til Strilen ved 10.30-tida fredag.

Geitle seier at den mistenkte var på staden då eigaren av bustadhuset tett ved oppdaga brannen i uthuset klokka ti på fem om natta.

– Den same personen som me har hatt til avhøyr, er også sikta for brannstifting i samband med to andre brannar i same område i juni i år, seier Geitle.

Den siste branntomta er no avsperra og det lokale politiet har bede om assistanse frå branntekniske ekspertar, som vil gjera sine undersøkingar i ruinane så snart dei får sjansen.

– Men det er usikkert om det vil skje i dag fredag, opplyser Geitle.

Mannen vart utpå dagen fredag lausslaten fordi retten ikkje fann politiet sine bevis mot han sterke nok til varetektsfengsling. Men han er framleis rekna som mistenkt, og han kan verta innkalla til nye avhøyr.