Matre gjev opp storkommune

? Ut frå signal frå andre kommunar og vedtak i enkelte kommunestyre, ser eg ikkje grunnlag for å gå vidare med prosessen rundt kommunesamanslåing, seier Håkon Matre til Strilen.

Nærsynt
Når denne saka kjem opp i kommunestyret i Masfjorden torsdag, er difor Matre si tilråding at det ikkje er aktuelt med vidare drøftingar om endring av kommunestruktur.
? Eg tek utspela frå andre kommunar til etterretning, men det betyr ikkje at eg er samd i utfallet. Eg tykkjer mange lokalpolitikarar er litt nærsynte i denne saka. Det er lett å seia at ein ønskjer å ha det slik det er, men eg er sikker på at denne diskusjonen vil koma opp att før det har gått ti år, seier Matre, som også er regionrådsleiar.
Regionen har fått pengar frå Kommunal- og regionaldepartementet for å gjennomføra ein prosess rundt kommunestrukturen i Nordhordland. Det er slutten på den prosessen  som no er i gang, og der skal kommunestyra uttala seg om kva som bør skje. Kommunestyra både i Fedje, Austrheim og Meland har gjort vedtak om at dei ønskjer å halda på noverande grenser.

Ikkje bortkasta
Matre meiner at den prosessen ein no har vore gjennom, ikkje er bortkasta. Ein har fått fram ein del synspunkt, folk har vorte involverte gjennom folkemøte rundt i kommunane og politikarane har vorte nøydde til å tenkja gjennom kva samarbeid ein ønskjer.
? Me vil nok måtta ta ein ny runde om korleis med ønskjer å samarbeida over kommunegrensene, seier Matre. Det ligg også inne i framlegget til vedtak.

Pressar seg fram
? Eg skulle ønskja at lokalpolitikarane var meir aktive i denne saka og styrde prosessen sjølve. No risikerer me å verta pådytta løysingar utanfrå, seier Matre.
Han trur mellom anna at opprettinga av regionar i staden for fylke kan pressa fram ei endring også i kommunestrukturen.
? Viss me tenkjer 40-50 år fram i tid, er neppe kommunestrukturen slik som i dag, spår Matre.
Men dei næraste åra ser han ikkje for seg at det skjer endringar i Nordhordland.