Måtte stengja nyopna barnehage i Meland

Den nye barnehagen som Barnebygg står bak på Moldekleiv, opna i går. Men det har dei tydelegvis gjort litt for tidleg. For då kommunelege Tord Molturmyr var på synfaring, krov han barnehagen stengd med ein gong. Grunnen er at store anleggsmaskiner køyrer inn og ut av plassen der borna skal leika, til dels utan at hjelpemenn passar på at borna ikkje vert påkøyrde.
? Det var ein rein anleggsplass. Slik skal det ikkje sjå ut der born skal leika, seier Moltumyr til Strilen.

Vera inne
Kommunen gjorde hastevedtak og bestemte at barnehagen måtte stengja med ein gong. Men kommunelegen vedtok likevel at borna kunne vera i barnehagen i går, men med streng beskjed om at dei måtte halda seg inne i bygget. Men dette galt berre for i går.

Strenge krav
Kommunelegen har stillt strenge krav til kva som må gjerast før barnehagen får lov å opna igjen.
Alle anleggsmaskiner, alt armeringsjern og alle reiskapar må vera fjerna frå uteområdet. Leikeplassen skal vera inngjerda, og der må monterast port.
All køyring i området må vera varsla til personalet på førehand.

Inspisera
? Utbyggjar seier at dei skal ha alt på plass slik at barnehagen kan opna i morgon. Men me kjem til å ha folk på plass i morgon tidleg for å sjå at slik er tilfelle. Viss det ikkje det er, får ikkje barnehagen opna, sa Moltubakk til Strilen i går.
Det er mellom 40 og 50 born i barnehagen.

Beklagar
? Me må berre beklaga at barnehagen opna slik det var der i dag, men anleggsmaskinene skulle gjort seg ferdige i helga, sa dagleg leiar Geir Egil Høvring i Barnebygg til Strilen.
Det bygde difor på ei misforståing at maskinene var der i går. Slik stoda var, vart det bestemt at borna skulle vera inne i går, men Høvring lova at anleggsmaskinene og anleggsutstyret skal vera borte til i dag. Gjerde og port kom på plass alt i går. Resten av uteområdet skal dei gjera klart når våren kjem. Tysdag kunne kommunen godkjenna at barnehagen hadde ope på vanleg måte.