Maya fekk pris for innsatsen

Maya Vabø Mongstad (23) fekk overrekt prisen på årsmøtet til Idrettslaget 1. desember. Leiar i handballgruppa Arvid Rosnes delte ut prisen som var ein glasvase og eit rosande brev. Han seier at Maya Vabø Mongstad fekk prisen fordi ho alltid er positiv og stiller opp på absolutt alt. Rosnes omtalar Maya som ein flink trenar og spelar og ein viktig initiativtakar. Vidare fortel han at ho har vore med på mange kurs og dugnader. Dessutan har ho ordna med sponsorar og mykje anna som er viktig for å få eit bra handballmiljø.

Vore med i 15 år
Maya Vabø Mongstad starta handballkarrieren i 8-9 års alderen og har no vore aktiv i handballmiljøet på Lindås i 15 år. I dag trener ho handball fire dagar i veka. I tillegg kjem alle kampane. Alt dette klarer ho å pressa inn mellom studiar og jobb. Dessutan spelar ho litt fotball og driv litt styrketrening «berre sånn for moro skuld». Sjølv trivest Maya Vabø Mongstad godt i idrettslaget, og ho synest det er kjekt at Lindås IL set pris på innsatsen hennar.
? Eg heldt på med dette fordi eg likar det, seier ho.
? Handball skal væra litt show, det er det eg likar med spelarar som Anja Andersen. Ho er genial på bana. Når eg spelar er eg heilt i mi eiga verd, så det hender at eg finn på litt merkelege ting.

Innom Tertnes
Tidlegare hadde også Vabø Mongstad ambisjonar om å verta proff. Ei stund spela ho faktisk handball på Tertnes sitt rekruttlag og ho fekk sjansen til å trena Tertnes sitt A-lag ein gong.
? Det var ei spesiell oppleving, men det vart litt vel mykje trening og alvor. No er det meir for gøy. Det er kjekt å sjå at spelarar utviklar seg og du blir godt kjent med spelarane, seier ho
Maya Vabø Mongstad meiner at handballmiljøet på Lindås er veldig bra, og at dette er viktig for å lukkast.