Meir snø i vente

? Tysdag og onsdag er det venta nordvest bris på kysten og enkelte snøbyger. Frå torsdag ventar me stigande temperatur og meir sørleg vind. Då er det fare for sludd og regn, opplyser meteorolog Magnus Angelvik ved Vervarslinga på Vestlandet til Strilen.

Angelvik seier at det natt til måndag kom meir snø i Nordhordland enn i Bergen og sørover.

Smell på brua

Det alvorlegaste uhellet Strilen hadde registrert innan kl. 14.30 i går, kom på Nordhordlandsbrua Ein kjedekollisjon førte til at ei kvinne måtte fraktast med ambulanse til legevakten i Bergen.

I alt tre bilar var involvert i kjedekollisjonen. Det var ein  person i kvar bil. Politiet fekk melding om ulukka ved 09.15-tida måndag.

- Etter det me har fått opplyst, vart kvinna ikkje alvorleg skadd, opplyser politiførstebetjent Ove Hindenes til Strilen. Kvinna er snart 30 år og heimehøyrande i Bergen. Også dei to andre som var involverte i ulukka, er heimehøyrande i Bergen, opplyser Hindenes.

Dei tre bilane var på veg nordover mot flytedelen då ulukka skjedde.

- Det kom ein brøytebil imot, og snøføyka frå denne kan ha skremt kvinna som var i den fremste bilen, ein Toyota Corolla, seier Hindenes. Det var også glatt då kollisjonen skjedde.

Det var bilen som var i midten, ein Volvo, som fekk mest skadar. Dei to andre bilane fekk berre mindre skadar.

Få klager

Dei lokale lensmannskontora har ikkje registrert klager frå publikum på brøytinga. HSD sin trafikkvakt har heller ikkje notert nokon klagestorm frå sjåførane.

Men lensmann Roar Tofting i Austrheim meiner brøytinga på riksvegen 565 frå Marås mot Austrheim kunne vore betre.

? Eg passerte strekninga mellom kl. 07.30 og 08.00, og då kunne det vore brøyta betre, synest Tofting. Men verken han eller andre lensmannskontor har notert klager på brøytinga frå publikum.

Etter kl. 07.00 var det ein del vanskar i Lundsdalen på Radøy.

? Eg har 4-hjulstrekk, så det gjekk heilt fint å kjøra til Radøy i går, seier kultursekretær Rune Rydland. Han passerte Lundsdalen før perioden der det korka seg til.

Få buss-forseinkingar

? Her hjå oss har det gått veldig greitt. Me har ikkje registrert verre forseinkingar enn opp til ti minuttar på enkelte ruter, seier Karl Dale ved HSD sin trafikkvakt i Knarvik.

Dale seier at forseinkingane i stor grad skuldast privatbilar som kjører seint eller har sett seg fast.

? Frå sjåførane og inn til oss har det vore heilt stille. Så det må tyda på at brøytinga har gått greitt, seier Dale.

Mest si avdeling i Knarvik har også eit klart inntrykk av at brøytinga har gått greitt.

? Me har ikkje fått nokon klagestorm, seier driftsansvarleg Torgeir Eidsnes ved Mesta si avdeling i Knarvik. Om det har vore problem enkelte stader, seier Eidsnes at bilistane må rekna med at det tek litt tid å få snøen unna når snøfallet er på det verste.