Meland har passert 6000

Folketalet i regionen auka med 363 i fjor. Men det er ikkje alle kommunane som har folkevekst.
Det er først og fremst Lindås som trekkjer opp folketalet i regionen, med ein auke åleine på 309 innbyggjarar i fjor. Meland medverkar også sterkt til veksten, og auka folketalet med 85.

Passerte 6000
Med ein auke på heile 48 berre i siste kvartal passerte Meland 6000 i folketal med god margin i 2006. Ved årsskiftet var innbyggjartalet 6016. På under ti år har folketalet auka med tusen personar. For 15 år sidan hadde Meland og Radøy om lag same folketal. Men medan Meland har hatt auke, har Radøy stått omtrent i ro og har no eit folketal på 4.658.
? Noko feiring? Nei, slikt får ordføraren ta seg av, ler assisterande rådmann Kari Anne Iversen i Meland.
Ho er glad for at kommunen har auke i folketalet, og seier at det er spanande å arbeida i ein vekstkommune. Ho trur nok at det er mange andre kommunar som kunne ha tenkt seg ein slik situasjon.

Også utfordrande
Men ho seier og at veksten medfører ein god del utfordringar. Planutvalet har no difor rådd kommunestyret til å starta arbeidet med ein kommuneplan for bustadbygging. Denne skal vera ein reiskap for å styra veksten i kommunen.
? Skulane må ha plass til å ta imot nye elevar, det skal teknisk infrastruktur på plass og ein skal ha kapasitet innan andre kommunale tenester som helse, kultur med vidare, seier Iversen.
Den nye planen, som Iversen håpar skal verta behandla av det sitjande kommunestyret, vil til dømes styra kvar og i kva tempo veksten i kommunen skal skje.

Vekst i Lindås
I Lindås held og veksten fram i siste kvartal, men litt svakare enn før i året. Men også i siste kvartal hadde kommunen eit høgt fødselstal med 51. Det er høgare enn kommunar som Os og Stord, som har fleire innbyggjarar.
Austrheim ser og ut til å vera inne i ein positiv trend, med ein auke på 14 personar siste kvartal. Det gjer og Radøy og Modalen som hadde ei vekst med ni og sju. I Gulen gjekk folketalet opp med ein person fjerde kvartal.

Vidare ned
Men på Fedje og i Masfjorden held nedgangen fram. Begge kommunane hadde kraftig nedgang også fjerde kvartal: Fedje med ti og Masfjorden med 19. Det er tydeleg at prosjektet som Masfjorden har sett i gang for å snu trenden, enno ikkje har hatt nokon verknad. Faktisk vart 2006 eit av dei mest negative for Masfjorden når det gjeld folketalet.
Ein ser og at medan Meland, Lindås og Austrheim har høge fødselstal, er det motsette tilfelle i Gulen og Masfjorden.
I heile landet auka folketalet med 40.900 i 2006. Så stor vekst har det ikkje vore registrert før. Ved utgangen av året budde det 4.681.100 menneske her i landet.

Slik er tala
Slik er tala for heile 2006 fordelt på kommunar:
Kommune    Folketal 01.01.    Fødde        Folketal +/-    Folketal 31.12.
Modalen    354    4    +2    356
Meland    5.931    81    +85    6.016
Radøy    4.635    44    +23    4.658
Lindås    13.285    191    +309    13.594
Austrheim    2.485    34    +35    2.520
Fedje    638    8    -18    620
Masfjorden    1.693    16    -62    1.631
Gulen    2.417    18    -11    2.406