Meland-nei til bompakken

Det som fekk fleirtal var eit fellesframlegg frå Meland Høgre, FrP og Ap, som gjekk på å arbeida for å få Nyborgtunnelen inn i Nasjonal Transportplan i perioden 2009 - 2019. Når tunnelen har kome på plass kan ein setja opp ein bom ved tunnelen, med høve for gratis omkjøring over Hylkje. Det er også i dette forslaget eit krav om minst 50 prosent statleg finansiering.
Samarbeidslista (Sv, Rv og Sosialdemokratane) og Marie Morken (Sv) var kanskje den som markerte seg sterkast mot bompengar i debatten. Morken la fram eit forslag som mellom gjekk på at Meland kommunestyre går i mot Nordhordlandspakken slik han ligg føre. Dei var heller ikkje villige til å vera med på å betala bompengar for vegar andre stader i regionen.
Fellesforslaget frå H, FrP og Ap vart vedteke mot KrF sine fire og Samarbeidslista sine tre representantar.
Meland kommunestyre var det første som tok stilling til det nye forslaget om Nordhordlandspakke. Dette forslaget inneber at det største prosjektet i fase 1 vert ny riksveg over Radøy, medan Nyborgrunnelen kjem i fase 2. Forslaget inneber og at det kjem ein bom som skal stå ved Nordhordlandsbrua. I tillegg til ny riksveg over Radøy, vert det ein del utbetringar av andre vegar i regionen samt trafikksikring. Rundkjøringar i Knarvik er og med.
Lindås kommune skal ta stilling til Nordhordlandspakken seinare i dag. Vert det nei også der, betyr det mest truleg stopp for heile prosjektet slikt det no ligg føre.