Melandsøstre får sjansen

Hildegunn og Ingelin Garnes Reigstad har dreve med musikk store delar av livet. Tvillingsøstrene vart kjent i heile landet då dei debuterte på NRK programmet Beat for Beat for nokre år sidan. No har melandjentene fått nok ein kjempesjanse.

Headhunta av NRK
Dei unge musikarane er nemleg plukka ut til å vera med i ny talentkonkurranse som skal sendast på NRK1 i haust. Jentene vart nærmast «headhunta» av fjernsynskanalen.
? Me vart oppringt av NRK-programleiar Dan Børge Akerø. Han fortalde at han nylig hadde sett oss under innspelinga til eit innslag i Beat for beat og spurte om me var interesserte i å vera med, seier Ingelin Garnes Reigstad. Ho er overraska og veldig glad over å få eit slikt tilbod.
? Det er rett og slett ein kjempesjanse. Me får sjansen til å gjera musikken vår kjent og er med i konkurransen om ein pengepremie. Det økonomiske er viktig når ein vil satsa vidare på musikken, seier ho.

Satsar på musikk
Dei siste tre åra har Garnes Reigstad-søstrene satsa fullt og heilt på musikkinteressa.
Dei kallar seg for «Garness» og har planar om å gje ut eiga plate. For tida bur begge to i Oslo og arbeider med å utvikla musikken sin. Dei syng popmusikk, viser, og spelar sjølv gitar og ei rekkje andre instrument.
Songane skriv dei også sjølv. I Kjempesjansen-konkurransen skal jentene synga ein eigenkomponert song som heiter «Loose treads».
? Me var litt usikre på kva song me skulle velja. Me bestemte oss til slutt for denne. Det er ein song som har fungert godt live og det er ein song som mange nok vil kjenna seg igjen i. Songen handlar om å ikkje heilt ha kontroll over livet sitt. Å ha eit hektisk liv med mange ting som skjer på ein gong. Då hender det at ein nesten vert lamma og kjenner det som om ein ikkje får gjort noko, seier ho.

Direktesendt
Garnes Reigstad fortel at kjempesjansen er eit direktesendt program.
? Det er ein ny og uvant situasjon for oss. Me vert nok veldig nervøse, men eg er sikker på at det vert kjempegøy, seier ho.
Programmet er lagt opp slik at publikum i heimane kan senda tekstmeldingar og stemma fram deltakarane.
? Det vert spanande å sjå kor langt me kjem. No håpar eg berre at det er mange som stemmer på oss, seier ho.