Men gjerdet var lovleg likevel!

Papirbunken er etter kvart høg for det meterhøge gjerdet kring Foss si tomt i Knarvik, nabotomta til Reklamehuset. Gjerdet er sett opp i grensemerket, og har sidan oppføringa merdverka til eit kutt i talet på parkeringsplassar kring nabobygget. Ein del av Reklamehuset sine opphavleg innmelde parkeringsplassar er ikkje tilgjengelege utan å kjøra over tomta til Foss, noko som gjerdet effektivt stoppar.

Kommunen har i fleire omgangar kome med innvendingar på gjerdet, og Bjarne Foss har via sitt selskap fått pålegg om å ta det vekk.

Saka har vore fleire rundar til klage­handsaming hjå Fylkesmannen i Hordaland, men i den siste runden der har saka teke ein ny vri.

Fylkesmannen skriv at kommunen ikkje har handsama saka riktig i den tida som har gått sidan gjerdet sist var ein runde innom Statens Hus i Bergen.

Tvert om meiner Fylkesmannen at gjerdet per i dag formelt sett er godkjent av kommunen.

Angreip klagen
Kommunen har i fleire rundar gjeve pålegg om fjerning, med trugsmål om tvangsmulkt. I januar 2011 vart det gjort eit slikt pålegg, som Foss påklaga til Fylkesmannen, og som Sponheim og kompani tok stilling til i juli 2011. Og her startar klusset, les berre kva Fylkesmannen skriv om dette:

– I vedtak av 7. juli 2011 oppheva Fylkes­mannen kommunen sitt vedtak om pålegg og tvangsmulkt. Vårt vedtak innebar at kommunen på ny måtte vur­dera om det var grunnlag for å gje pålegg om riving, og eventuelt fatta nytt vedtak om dette, heiter det i siste brev frå Fylkesmannen i gjerdesaka, som kom til kommunen ved juletider 2011.

Men av neste oversending frå Lindås kommune konkluderer Fylkesmannen med at kommunen har rota det til.

– Av oversendinga i september 2011 går det fram at kommunen ikkje har fatta nytt vedtak om pålegg. Kommunen har i staden handsama klaga frå Foss på nytt, og så sendt klaga til Fylkesmannen for klagehandsaming.

For dei som heng med enno, Fylkesmannen påpeikar altså at det ikkje er vits i for kommunen å ta klaga frå Foss opp til ny handsaming, når Fylkesmannen har gjeve Foss medhald og oppheva det vedtaket Foss klaga på.

Godkjent i 2008
Med bakgrunn i dette vil ikkje Fylkesmannen gjera meir i denne omgang:

– Det ligg såleis ikkje føre noko nytt pålegg, og følgjeleg heller ingen ny klage som Fylkesmannen kan ta stilling til. På denne bakgrunnen vert saka returnert til kommunen for vurdering av om det er grunnlag for å gi pålegg, heiter det i brevet.

Tvert om les Fylkesmannen seg fram til at gjerdet er godkjent av Lindås kommune, etter eit vedtak i plan- og miljøutvalet heilt tilbake i 2008.

– Vedtaket vart påklaga og så omgjort av kommunen, men omgjeringsvedtaket vart oppheva av Fylkesmannen. Sakshistorikken viser ikkje at kommunen etter dette har endra vedtaket av 9. april 2008, skriv Fylkesmannen i sitt brev.

Kommunen kommenterer
Strilen har spurt Lindås-administrasjonen om kommentar til brevet frå Fylkesmannen. Svaret frå kommunen er «Brevet frå Fylkesmannen er til no ikkje blitt handsama, på grunn av stor saksmengde. Byggesaksavdelinga arbeider med saka, og vil tilskrive tiltakshavar».