M/F «Jondal» trafikkerer Fensfjordsambandet

I ei melding frå HSD heiter det at kaien i Skipavik, som fekk skader då M/F «Eidfjord» onsdag morgon braste inn i ferjekaien, vert nytta med hjelp av kran.
? Me har ein mobilkran på staden for å løfta og senka ferjebrua, seier informasjonssjef Arild Sondre Sekse i HSD.
Ferjebrua er den delen av kaien som vert heva eller senka for å koma på nivå med ferja. Sylindrane på ferjebrua vart skadde i samanstøyten, og til desse er ordna må ein ha hjelp av kran.

Teknisk svikt
Dei som bur på Sandøy, Mjømna eller Byrknesøy i Gulen var heile dagen onsdag utan bilferje etter uhellet, som etter det HSD har funne ut skuldast tekniske problem på ferja.
? Våre inspektørar har vore og sett på ferja, og undersøkt maskin og naudstyresystem. Dei har funne ut at det var ein teknisk svikt, seier Sekse.

Redusert kapasitet
M/F «Eidfjord» vart onsdag kveld slept til Bergen, og skal reparerast på BMV.
? Me har fått opplyst at arbeidet vil ta to til fire dagar, seier informasjonssjef Sekse.
Sambandet har no redusert kapasitet, då ferja M/F «Jondal» berre har kapasitet til 35 bilar, mot 75 bilar på M/F «Eidfjord».
? Før helga skal me ha på plass ei ferje med like stor kapasitet som «Eidfjord», om det då ikkje vert «Eidfjord» som kjem attende.

«Eidfjord» frå 1975
Ekstraferja som no er sett inn er henta frå sambandet Halhjem - Våge, slik at ferje 2 i dette sambandet er innstilt inntil vidare, heiter det i meldinga frå HSD.
M/F «Eidfjord» vart levert frå Løland Verft, Leirvik i Sogn, i 1975. Innan næringslivet i Gulen er det fleire som har teke til orde for at ferja er for gamal til å nyttast i sambandet.
Ferja som no er sett inn mellombels, M/F Jondal, vart levert frå Mjellem & Karlsen i Bergen i 1974.