Millionrekning for barnehagar

Ei ny forskrift om lik handsaming av pri­vate og offentlege barnehagar skapar økonomisk trøbbel for Radøy.

Kommunen får rekninga for born utan lovfesta rett til barnehageplass, der foreldra har ordna plass i private barnehagar i andre kommunar.

På tampen av juni dukka rekningane opp for plassar i bruk første halvår, Bergen kommune vil ha 420.000, Lindås anslår at dei skal ha 700.000 kroner, og Meland har også meldt seg på og vil ha pengar av radværingane.

– Om ein privat barnehage får eit barn inn, så har dei krav på refusjon frå kommunen sin, som igjen kan krevja refusjon frå barnet sin heimkommunen, seier Helge Vallestad, rådgjevar for oppvekst i Radøy kommune.

Dette gjeld også barn som ikkje har lovfesta rett på plass: Som er eitt år innan 1. september 2011, og der foreldra har søkt innan fristen.

– Borna kan avvisast i Radøy utan at me bryt lova. Får dei så plass i Bergen, vil Radøy måtta betala refusjonen til Bergen kommune.Ordninga gjeld berre private barnehagar. Får Radøy-born ein slik plass i ein offentleg barnehage i nabokommunane, kan ikkje denne kommunen automatisk krevja refusjon, kunne Vallestad torsdag forklara formannskapet i Radøy.
Ut av det blå

Millionrekninga kom ut av det blå for kommuneadministrasjonen, sidan dette ikkje er eit barnehageopptak som dei kjenner til på førehand. Det einaste Vallestad er nokolunde trygg på, er at det i desember kjem tilsvarande rekningar på totalt rundt ein million kroner.

Rådmann Christian Fotland sa til formannskapet at desse reglane alt var tekne opp med Fylkesmannen, og tilbakemeldingane derifrå var at embetet alt såg på saka.

– Når det gjeld skuleelevar i andre kommunar har kommunen full kontroll, når det gjeld barnehageplassar er det fri flyt, seier Fotland.

Les meir i papiravisa laurdag.