Millionutbytte til BKK-kommunar

BKK tente stort på vasskraftproduksjon i 2005, og resultat før skatt vart på 1,188 milliardar kroner. Etter skatt og minoritetsinteresser er det att 678 millionar kroner, og styret i BKK ynskjer at over 90 prosent, 617 millionar kroner, vert delt ut til eigarane som utbytte.
Lindås kommune hadde budsjettert med 8,9 millionar kroner i utbytte frå BKK. Dersom BKK-styret sitt forslag til deling av utbytte vert gjennomført får kommunen 3,1 millionar meir enn budsjettert.
? Dette vert ein reserve for kommunen, seier økonomisjef i Lindås kommune Vidar Kolstad.
Disponeringa av BKK sitt overskot skal godkjennast av generalforsamlinga, som finn stad i april.
 
Rekordresultat
BKK hadde i 2005 ein omsetnad på 3.291 milliardar kroner, og meir enn kvar tredje krone sat dei altså att med i driftsresultat før skatt.
? Dette er det beste resultatet i BKK si historie. Rekordstor produksjon av vasskraft er hovudgrunnen til dei svært gode tala, skriv konsernsjef Atle Neteland i ei pressemelding.
BKK har i følgje pressemeldinga også auke innan andre tenester, som alarm og breiband.
No går altså mange millionar av kroner ut til eigarane, i tillegg til at enkelte kommunar også hentar inn ein del millionar i eigedomsskatt. I alt betalar BKK 92 millionar kroner i eigedomsskatt, dette kjem i tillegg til andre skattar og avgifter på i alt 515 millionar

Meir vatn
Det var per 31. desember 2005 meir vatn i magasina enn normalt, noko som nok kjem godt med no ettersom det har kome lite nedbør utover seinvinteren.
Samla kraftproduksjon i 2005 var 8132 GWh mot 6323 GWh i 2004. Straumforbruket i BKK sitt nettområde låg på 7298 GWh i 2005, ein auke på 9,6 prosent.
BKK er eigd av Statkraft og 17 kommunar mellom Sognefjorden og Hardangerfjorden.

Eigar:                                 Eigardel:        Del av utbytte for 2005:
Statkraft Holding AS       49,90 %        307.883.000
Bergen kommune           37,75 %        232.917.500
Askøy kommune             2,48 %          15.301.600
Lindås kommune            1,95 %           12.031.500
Fjell kommune                 1,89 %           11.661.300
Sund kommune               1,02 %           6.293.400
Kvam herad                      0,90 %           5.553.000
Meland kommune           0,76 %           4.689.200
Radøy kommune             0,74 %           4.565.800
Voss kommune                0,62 %           3.825.400
Øygarden kommune       0,52 %           3.208.400
Austrheim kommune       0,43 %           2.653.100
Vaksdal kommune          0,37 %            2.282.900
Gulen kommune              0,27 %           1.665.900
Høyanger kommune       0,12 %           740.400
Fedje kommune               0,12 %           740.400
Masfjorden kommune     0,10 %           617.000
Granvin herad                  0,05 %           308.500
                                            99,99 %         616.938.300 kroner