Minister opnar havbruksstasjonen

? Det er heilt klart at ministeren kjem, men me har også invitert ei rekkje gjester både frå inn- og utland, og det er ikkje avklart kor mange av dei som kjem, seier stasjonsleiar Øivind Torslett til Strilen.
Ein skal skikkeleg slå på stortromma når nybygget på Matre offisielt vert opna tysdag 10. oktober. Bygget har kosta rundt 170 millionar kroner, og det er av dei meste avanserte i verda på visse område.

Open dag
Tysdagen vert først og fremst for inviterte gjester med omvising i bygget og offisiell opning på dagen. På ettermiddagen er det fagseminar i Bergen og festmiddag om kvelden.
Men onsdag 11. oktober er det open dag på Matre, og då er alle inviterte til å sjå kva nybygget rommar, seier Torslett.

Innkøyringsfase
Nybygget har vore i bruk sidan mai, og no tek ting til å fungera slik dei skal.
? Me har hatt visse innkøyringsproblem, særleg med energianlegg og varmepumpa, men no ser dei ut til å vera løyste, seier Torslett.
Ein har no meir og mindre teke heile nybygget i bruk, men framleis står det att litt arbeid utvendig.