Mink tok 51 duer

? Eg begrip ikkje kvifor det ikkje kan innførast skotpremie på desse mordarane, seier Korneliussen. Og då snakkar han både om mårkatten og minken, som i alt har drepe over 120 duer, åtte høner og ein hane hjå Korneliussen dei siste åra.

Hadde ti sortar
I november 1997 tok måren 36 duer og i februar året etter tok han 26. Sidan har han blitt spart heilt fram til i fjor, då ein mink drap åtte høner, ein hane og fire duer. No hadde Korneliussen heile ti ulike sortar duer som han var svært stolt av.
At minken har klart å koma seg inn i duekleiva synest Korneliussen er heilt utruleg. Minken har nemleg først klart å koma seg gjennom det tette nettinggjerdet, for så å grava ei grop i bakken under veggen. Korneliussen oppdaga ikkje ugjerninga før han skulle sjå til duene sine om morgonen.

Fekk sjokk
? Då eg opna døra til kleiva fekk eg heilt sjokk, for der låg alle duene mine strødde utover. Mordaren låg innerst i hjørnet og hoppa inn luka til naborommet då eg opna døra, seier han.
I håp om at minken ikkje stakk av same vegen som han hadde kome inn, henta Korneliussen hagla. Og det vart minken si endelykt.

Bestanden har auka
Korneliussen meiner bestemt at det no er langt fleire slike rovdyr enn før, og spesielt mårkattar. Om grunnen til det fortel han at mange revar dei siste åra har døydd av reveskabb, og sidan livretten til revane er mårkattar, er mårkattbestanden blitt for stor. Med bakgrunn i denne endringa, meiner han det er på høg tid å revurdera avgjerda om freding. Det er nemleg ikkje berre på Holmås det er mange rovdyr. Korneliussen kjenner mange som har same problemet som han.