Mongstad kan få ti nye bedrifter

Det er løyvd 15 millionar kroner i statsbudsjettet til dei nye industriinkubatorane i 2007. Desse skal stimulera til nye vekstkraftige bedrifter i ei stor morbedrift eller ei dominerande næring på ein stad. Kommunal- og regionaldepartementet gjer dette gjennom å styrkja Selskapet for Industrivekst (SIVA).

Minst ti ny  bedrifter
Ein industriinkubator skal skapa minst ti nye vekstkraftige verksemder gjennom ein programperiode på fem år. Morbedriftene forpliktar seg til å stilla med kompetanse, utviklingsmidlar og lokale, og gjerne også kjøp av produkt eller tenester i ein oppstartsperiode. Ved utgangen av 2006 vil det vera etablert 12 industriinkubatorar. Programmet vart starta opp i 2004 og vert operert av SIVA.

Interesse frå bedrifter
Arent M. Henriksen i SIVA seier at det har vore avgjerande for valet av Mongstad at store potensielle morbedrifter som Statoil, Hydro og Frank Mohn har vist stor interesse for prosjektet. Dei startar no opp ein pilotfase på tre til fire månader, der det vert avgjort korleis arbeidet skal organiserast. Det mest aktuelle er truleg å starta opp ein industriinkubator som ei eiga bedrift. Korleis dei 15 millionar kronene neste år, pluss ein million kroner inneverande år, skal fordelast mellom dei fire nye industriinkubatorane, vert avgjort nærmare gjennom pilotfasen. Men målet er altså å skapa minst ti nye livskraftige bedrifter på Mongstad dei neste fem åra.

SIVA styrer prosjektet
Det er SIVA som vel ut kva miljø som skal få industriinkubator. Forutan Mongstad, er dei nye prosjekta industrimiljøet i Lyngen i Troms, mat- og næringsmiddelindustrien på Jæren med lokalisering i Hå i Rogaland og ein regional industriinkubator for leverandørindustrien i Nord-Noreg med lokalisering i Harstad i Troms.
? Dette er eit viktig tiltak for å sikra framtida til lokalsamfunn i ei tid med raske endringar. Eg gler meg stort over at dei første etablerte industriinkubatorane i Stord og Verdal ser ut til å gje langt fleire etableringar enn det som var føresett i programmet, uttalar kommunal- og regionalminister Åslaug Haga i ei melding.