Mongstad-krysset i boks

? Dette er gode nyhende, seier Solveig Lerøy i Mongstad Næringshage.
Å få på plass rundkøyring og undergang for fotgjengarar i Mongstad-krysset, er nøkkelen for å få etablert eit nytt næringsområde på vestsida av riksvegen. Slik det er i dag, er området mykje vanskelegare tilgjengeleg på grunn av trafikken. Dette vert heilt annleis når ein får på plass rundkøyring og undergang for fotgjengarar.
Dette næringsområdet skal vera for servicenæringar, handel og kontor. Det vert eit viktig supplement til industriverksemdene aust for riksvegen. For 20 år sidan var det og snakk om å etablera overnattingstilbod til industrien i området.
Lerøy seier at det har vore noko interesse for dette næringsområdet, særleg frå lokalt hald. Sjølv håpar ho på at til dømes store matkjeder som ICA eller Meny ønskjer å etablera seg der.

Vart dyrare
Austrheim kommune og Statoil har tidlegare stilt økonomisk garanti for nytt kryss ved Mongstad. Det oppstod problem då det viste seg at dei to nemnde prosjekta vart eit par millionar dyrare enn tidlegare kostnadsrekna.
Statens Vegvesen meiner no at prosjekta kjem på rundt 12 millionar, og bad difor Austrheim kommune om å forskotera inntil to millionar kroner for å kunna gjennomføra prosjekta i samsvar med godkjente planar. Kommunestyret sa nyleg ja til dette under føresetnad av at fylkesmannen godkjente eit ekstraordinært låneopptak.
Dette har no altså fylkesmannen sagt ja til.