Motorsyklist omkom i frontkollisjon

Ulukka skjedde ved 18.30-tida, då ein større personbil med hengar og ein motorsykkel kolliderte.

– Ulukka skjedde i ein kurve og mortorsyklisten, som kom nordover, omkom på staden. Han er ein familiemann på 42 år med born og busett i Åsane, opplyser fungerande lensmann Sigmund Erstad til Strilen onsdag føremiddag. Namnet var då ikkje frigjeve.

Erstad opplyser vidare at det er oppretta kriseteam for den omkomne sin familie. Føraren og ein passasjer som var i den møtande personbilen, får tilbod om tilsvarande hjelp lokalt, via kommunelegen i Meland.

– Me fekk melding om ulukka klokka 18.35, opplyser Preben Wallestad ved Hordaland Politidistrikt sin operasjonssentral til bt.no tysdag kveld.

Både politi og ambulanse rykka straks ut.

– Luftambulanse er også på plass, opplyser ein person på staden til Strilen like før klokka 19.00. Etter kvart viste det seg at forsøk på gjenoppliving ikkje førte fram.

– Føraren av personbilen og passasjeren kom frå kollisjonen utan fysiske skadar, opplyser Sigmund Erstad.

Vegen vart stengt til seint på kveld for å få gjort åstadsgranskingar.

– Dei vart utført av politiet sine folk frå krimteknisk avdeling i Bergen og åstadsgruppa til vegvesenet, seier Sigmund Erstad.

Ulukka skjedde på Steinberget på Ryland. Fastbuande i området har gjennom mange år kjempa for å få sett ned fartsgrensa på staden.