Myking-elevane best

Dei sju elevane i klassen vann årets Vis med Avis-konkurranse for Strilen. I ei veke har elevane brukt Strilen-aviser i norsktimar, og fått som heimelekse å lesa i avisa. Etterpå fekk dei ein avkryssingsprøve for å sjå kor mykje dei hugsa, og ingen andre sjuandeklassar i Nordhordland var like flinke som ungdommane på Myking.
- Læraren plukka ut artiklar, som me fekk i heimelekse å lesa, seier Katrine Wergeland.
Og så flinke var Katrine og medelevane til å lesa at poengsummen vart 17,1 i snitt. Det er bra når 18 poeng er det beste.

Nyhende og teikneserie
- Det er gøy å lesa nyhende, seier Kristina Risa Fimland.
Dersom ho tykkjer ei sak er interessant les ho den sjølv om det ikkje er om ting i nærleiken av Myking.
- Det er gøy å sjå kven som har fødselsdag, og så er det gøy å lesa teikneserien, seier Katrine Wergeland.
At Pondus-stripa fenger mellom ungdommane er lett å sjå på Myking, det første Joachim Hauge finn i avisbunken som journalisten har med seg er nettopp baksida og Pondus.

Ute i verda
- Eg les litt aviser innimellom. Det er kjekt å følgja med på det som skjer ute i verda, seier Joachim Hauge.
Men elevane medgjev at det vert litt mindre avislesing no etter at prosjektveka er over.
- Det vert ikkje like mykje no. Men eg les litegrann, seier Katrine Wergeland.
Også i fjor var det 7. klasse ved Myking skule som stakk av med førstepremien i Vis med Avis for Strilen. Begge åra er det Finn Stedal som har vore klassestyrar for klassen.
- Elevane har vore flinke til å lesa i avisa, og me har diskutert artiklane på skulen, seier Finn Stedal.

Leirskulepengar
Då 7. klasse ved Myking skule vann konkurransen i fjor, brukte dei premien på 1.500 kroner som lommepengar under leirskuleopphaldet. Vinnarelevane frå 2006 har planar om å gjera det same, dei skal nemleg til Kinsarvik på leirskuleopphald første veka i juni.
- Me skal klatra, gå tur i fjellet, bada, skyta med pil og bue og padla kano, fortel Katrine Wergeland, Joachim Hauge og Kristina Risa Fimland.

200 aviser ute
I tillegg til Myking-elevane var også 7. klassingar frå Årås skule, Sagstad skule, Lindås barneskule, Eikanger skule, Knarvik barneskule, Manger skule og Skodvin skule med i konkurransen. Deltakardiplom er på veg til desse skulane. Med tre utgjevingar i veka sendte Strilen ut kring 600 aviser til dei lesande elevane i den veka prosjektet gjekk. Mange andre aviser i Hordaland har vore med, slik at kring 2000 sjuandeklassingar i fylket var involvert i avisveka.