Nære på i Knarvik

? Dette var nære på, seier Leif-Atle Træland i Lindås og Meland brannvern og nikkar opp mot husa. Ei trampoline som står tett ved er heilt øydelagt av brannen.
Træland kjende ikkje til årsaka til brannen, men seier at folk ikkje må finna på å vera uforsiktige med fyrstikker når forholda er slik som no. Brannvernet rekna faren som over rundt klokka 18.15, men dreiv ettersløkking vidare utover kvelden. Brannvernet starta tidleg evakuering av dei som var dårlege til beins og bur i omsorgsbustadene like nedanfor vegen, fortel Træland.
Også ved sjukeheimen vart folk evakuert, men fekk gå inn igjen kort tid etterpå.

? Eg var sikker på at bygget kom til å ta fyr, seier Karin Sæbjørnsen som bur i kjellaretasjen i bygget som ligg sør for Nordhordlandshallen.
Ho kom frå Bergen, og såg at det brann då ho køyrde over Nordhordlandsbrua. Då ho kom heim, sprang ho inn i huset og redda ut fotoalbuma til borna. Meir turte ho ikkje å ta med seg, før ho la på sprang. Flammane stod då høgt heilt nær bygget.

To mannspersonar, ein 23-åring og ein 24-åring, sat i 19-tida i avhøyr, mistenkte for å ha vore opphavet til brannen, opplyste Kjell Tore Aarnes ved Hordaland politidistrikt onsdag kveld. Politiet fekk melding om brannen klokka 17.43. Torsdag opplyste Rolf Pedersen ved Lindås og Meland lensmannskontor at dei to har vedgått å ha kubba ein røyk i området, slik at det tok fyr.
? Dei burde ha forstått at dette var risikabelt. Dei risikerer difor bøter, seier Pedersen.
Når de gjeld trampolina som brann opp og eventuelt andre skadar på materiell, har ikkje Pedersen noko klar formeining om dette, men seier at dette vanlegvis vert erstatta av eit forsikringsselskap. Deretter er det opp til forsikringsselskapet om dei vil koma med krav overfor dei ansvarlege.