Næringsbygg i tre etasjar?

Bygget skal gje kontorplass til både bedrifter som alt er i Sløvåg, og nyetableringar i industriområdet nord for Fensfjorden.

– Dette vert ei god plassering for administrasjonane for bedriftene i området, og ei ordning som gjer at ein ikkje må trekkja alle gjester og møtedeltakarar ned i industriområdet, seie Reidun K. Halland, som er dagleg leiar i Wergeland Halsvik, og styreleiar i selskapet Sløvåg Næringsbygg AS.

Selskapet bak næringsbygget vart etablert i 2009, med lokale aksjonærar, og no nærmar det seg byggestart. Bygget kjem i øvre kant av industriområdet, inn mot riksveg 57.

– Byggestart kan verta i mars 2012, og med bygget ferdig til innflytting til nyttår 2013 eller tidleg på vinteren 2013, seier Tore Halsvik, som er tilsett som prosjektleiar for arbeidet med næringsbygget.

Ein etasje til?
Det er i dag ein god del hyblar i Sløvåg for tilsette ved dei ulike verksemdene. Næringsbygget kan etter dagens planar gje plass til 20-25 hyblar, men ikkje nok til å erstatta alle som er i området i dag.

– Om desse hyblane skal erstatta dagens brakkeløysingar, er det trong for 40-60 hyblar, sa Hans Wergeland under informasjonsmøtet måndag.
Han var ein av fleire som mente at ein tredje etasje burde vurderast alt no.

– Fleire hyblar gjev også ei tryggare finansiering av bygget, sidan ein kan selja ut hyblar til dei verksemdene som treng det.

Prosjektleiar Tore Halsvik lova at ein skal vurdera både ein tredje etasje no, og sjå på korleis eit bygg på to etasjar kan leggjast til rette for ein ny etasje seinare.

Utfylla kvarandre
På grunnplanet vil Byggeriet/Mjømen og Berge ta den eine fløyen, medan Eidsbotn Handel (Ica) og Tess vil dela mesteparten av den andre. Andreetasjen vert litt redusert ettersom Byggeriet skal ha noko areal med større takhøgde. Vidare viser dagens plan to på etasjar plass til ein hybelfløy, til kantine/kafe, eit auditorium med plass til 70-80 personar, to videokonferanserom og i alt 1.100 kvadratmeter areal til kontor.

– Mellom andre Wergeland Holding, Halsvik Aggregates, Hjelp 24, fotpleie, massasje, og Gulen og Masfjorden Utvikling (GMU), er nokre av dei bedriftene Halsvik per i dag kan oppsummera som meir eller mindre klare leigetakarar.

I tillegg er dei i dialog med verksemder som tilbyr datatenester, rekneskapstenester, ingeniørtenester, og med advokat, reisebyrå, treningsstudio og meir til.

– Me ser på dei ulike leigetakarane, og ønskjer at dei skal utfylla kvarandre, seier Torill Torsvik Størkersen, dagleg leiar i Gulen og Masfjorden utvikling (GMU).