Næringslivet på studentjakt

Nordhordland handverk og industrilag (NHIL) inviterte studentar og lokale bedrifter til å koma saman i romjula. Tidleg kontakt er eit av fleire steg som må til for å lokka studentane tilbake til lokalt næringsliv etter at dei er ferdigutdanna, fortel Arvid Sulen i NIHL.

Må vera om seg
Informasjon om ledige stillingar lyser mot studentane frå høge bannerar og bedriftene står nærast i kø for å få kontakt med framtidas arbeidstakarar. Nokon byr på twist, andre byr på etterutdanning, fleire byr på sommarjobb.
? Me har fleire ledige stillingar, men det er hard konkurranse, seier Magnus Kvingedal, rektor ved Austrheim vidaregåande.
Arvid Sulen står ved Hydro sin stand for kvelden. Han fortel om eit skrikande behov for arbeidskraft på mange felt.
? Og me har vore svært nøgd med dei som kjem frå vidaregåande skular i Nordhordland, seier Sulen.

Bra initiativ
Like bortanfor står Inge Alver, rektor ved Knarvik vidaregåande, i prat med Svein-Inge Storsæter (19) frå Ostereidet. Storsæter har gått elektrolinja, og i tillegg skaffa seg studiekompetanse. No jaktar han på den perfekte læreplassen. Alver prøver å freista 19-åringen til å prøva læraryrket.
? Eg  veit ikkje heilt korleis eg hadde vore som lærar. Lang ferie freistar kanskje litt, seier Storsæter, medan han kikkar mot BKK sin stand. Der har han vore utplassert tidlegare, og ein slik læreplass ville han nok ikkje takka nei til.
? Det verkar lovande, det vert teke inn ein del lærlingar. Og ei slik samling som dette viser jo at dei er interesserte. Det vert vist engasjement til å få ungdommen tilbake til distriktet, seier Storsæter.
Han meiner eit slikt treff trekkjer meir folk enn utdanningsmessene, fordi det er sosialt og avslappa.
Ingrid Håland (19) har så vidt kome seg innom dørene før ho vert oppmoda om å søkja sommarjobb i Mongstad Test og Inspeksjon. Det er Ruth Elin Håtuft som har huka tak i jenta som går første år på Industriell design ved NTNU i Trondheim.

Ettertrakta
? Du skal ikkje sjå vekk ifrå at sjansane for å få sommarjobb hjå oss er veldig gode, seier Håtuft til Håland.
Nittenåringen er heime på juleferie og meiner romjula er eit flott tidspunkt å invitera studentane til å møta lokale bedrifter.
? Det er smart, for me får mellom anna sjansen til å stilla spørsmål som kanskje ikkje er like lette å stilla over internett, seier Håland, som kanskje alt har ordna seg ein sommarjobb.