NBK jagar tabelltoppen

Det var eit opplagt og bestemt lag som tok imot Vestsiden-Askøy på Knarvik gras laurdag. NBK starta friskt og best, og det meste av spelet gjekk føre seg på gjestane sin banehalvdel i byrjinga av omgangen.

Uavgjort
Etter ein halvtime runda Yngve Njøten keeper på sekstenmeteren og kunne lett og kontrollert setja inn kampens første mål. Enkelte gongar slapp også gjestane gjennom, og berre sisteskansen Ørjan Tredal hindra utlikning. Kvittrøyene frå Askøy fekk sitt einaste mål på straffe fem minutt før pause, og laga gjekk i garderobane med uavgjort.

Målfest
Etter pause var det tydeleg at begge lag ville veldig mykje. Vestsiden-Askøy hadde fleire målsjansar ved Marius Salamonsen, som kom aleine med keeper fleire gonger. Men målsjansar hadde også heimelaget nok av, og dei viste seg høgst effektive utover i andre omgang. Eit lite kvarter inn i omgangen sette Njøten inn dagens andre, og berre to minutt etterpå kunne han og lagkameratane feira 3-1 og hatrick. No var det berre eitt lag på bana og raudtrøyene fekk pynta ytterlegare på resultatet. Jack Halland gjorde 4-1 før Magnus Tande sette inn 5-1, som og vart sluttresultatet.
? Laget me møtte var greitt spellemessig, men dei datt litt i do etter vårt andre og tredje mål, seier trenar Arild Markussen.

Toppkamp
NBK er tabelltoar med sine 22 poeng, og møter neste helg tabelltopp Djerv på bortebane. Toppkampen går førstkommande søndag klokka 18. Trenar Markussen er spent før oppgjeret.
? Det vert spennande, og kanskje veldig jevnt. Om me klarar å halda hovudet klart og treff med opplegget vårt, så kan det gå. Det kan slå begge vegar, seier Markussen.