NBK-jentene lengst i Gothia Cup

Fem lag frå Nordhordland var med i årets Gothia Cup i Sverige. I veka som gjekk har tre NBK-lag, Eikanger og Radøy/Manger fått prøva seg mot jamaldrande fotballspelarar frå heile verda. Stolt trenar NBK-jentene var det av dei lokale laga som kom lengst i Gøteborg. Etter gruppespelet var dei klar for 16-delsfinale mot West Coast Soccers frå USA. Hard jobbing, to mål og ingen baklengs gav dei 2-0 siger og billett vidare til 8-delsfinalen. ? Ein bra kamp, seier trenar Marius Silseth til Strilen medan jentene får i seg mat og drikke før neste kamp. Det var tett mellom kampane torsdag, og berre få timar etter sigeren, var jentene i elden att. Men QBIC 1 vart for sterke for 17-åringane frå Lindås, og dermed enda dei cupeventyret torsdag ettermiddag. Då turneringa starta var det 80 lag med i klassen, og trenaren er stolt av innsatsen i laget. ? Dei har møtt tøff motstand heile vegen, men har vist ein eineståande moral og vilje når det gjeld mest, rapporterer Marius Silseth frå Sverige. ? Jentene viste at dei kan matcha dei beste jentelaga i verda og har all mogleg grunn til å vera stolt av prestasjonen. Laget enda mellom dei 16 beste av 80 jentelag i klassen jenter 17. Fire gutelag NBK hadde også to gutelag med i Gothia Cup. NBK1 kom på tredjeplass i si gruppe og spelte 32-delsfinale i b-sluttspelet mot Bjårreds IF torsdag. Der rauk dei ut av cupen med 8-0-tap. NBK2 hamna sist i si gruppe, og spelte sin 64-delsfinale i b-sluttspelet tidleg torsdag morgon. Den kampen tapte dei 2-1, og dermed var også dei ute av turneringa. Eikanger kom på ein sterk andreplass i si gruppe, og spelte onsdag playoff til a-sluttspelet mot Lyckeby GoIF1. Den kampen tapte dei knepent 2-1, og dermed var cupeventyret i Sverige over også for dei. Radøy/Manger rauk ut av cupen etter 2-0 tap mot Eds FF onsdag. Også dei kom på andreplass i si gruppe og måtte spela playoff til a-sluttspelet.