Nei takk til kommunal post

Kommunen bør ikkje overta posttenestene i Eivindvik når Solgul Blomst sluttar med Post i butikk 1. desember i år. I alle fall må ein undersøkja om andre, som Dingja Landhandel i Dingja, kan vera interessert i å overta tenesta. Det vart utfallet då kommunestyret torsdag skulle ta stilling til korleis ein skal sikra at det vert ei postteneste utover landpostbod i Eivindvik også etter 1. desember.

Post i depot
Eit folkemøte om saka tysdag konkluderte med at den beste løysinga i første omgang ville vera eit kommunalt postdepot. Det ville innebera at folk kunne henta og senda pakkar i ekspedisjonen på kommunehuset måndag til fredag mellom 09 og 15. Her ville dei og kunne kjøpa frimerke, men ikkje få utført banktenester. Resten av tenesta vert utført av landpostbod.
Dette var også framlegget frå ordførar Trude Brosvik (KrF).

For enkelt
Men varaordførar Hallvard S. Oppedal og resten av Senterpartiet var ikkje samd i denne løysinga.
? Det er Posten si oppgåve å løysa posttenestene, også i Eivindvik. Me kan ikkje påleggja kommunen sine tilsette, som alt har nok oppgåver, å ta seg av dette. Her har ikkje Posten gjort jobben sin, sa Oppedal.

Dingja
Han gjorde framlegg om at Posten kontakta Dingja Landhandel og høyrde om dei var interesserte i å overta Post i butikkfunksjonen. Han hadde snakka med innehavaren, og ho hadde ikkje avvist ei slik løysing.
Når vegen til Dingja opnar til våren, vil det berre vera rundt sju kilometer å køyra frå Eivindvik til Dingja.
? Men kva skal folk gjera i mellomtida, til vegen opnar? vart der spurt frå salen.
? Det må Posten finna ei løysing på, meinte Oppedal.

For innbyggjarane
? Eg er ikkje ute etter å løysa problema for Posten, men finna løysingar for innbyggjarane våre, sa ordføraren.
Ho avviste ikkje at Post i butikk på Dingja kan vera ei løysing seinare, men ville at ein skulle ha ei prøveordning med kommunalt postdepot i eitt år.
Eit alternativ med at folk i Eivindvik skulle reisa til Dalsøyra for å få utført posttenester, var og framme, men det vart klart avvist, i alle fall av representantane frå Eivindvik.
Avrøystinga viste at elleve gjekk inn for å seia nei til kommunalt postdepot no, og at ein i staden ber Posten om å kontakta dei som driv Dingja Landhandel.
Sju røysta for postdepot.
Odd Harald Eide, som er bror til Åse Lene Vatne, som driv Dingja Landhandel, var ugild. Kommunestyret mangla to representantar får å vera fulltallig.
Om folk i Eivindvik er villige til å reisa til Dingja for å ordna posttenestene sine, er eit anna spørsmål.