Nei til direkteval av ordførar

Nitten representantar i kommunestyret røysta mot å senda søknad om å få gjennomføra direkteval av ordførar, medan åtte røysta for. Dei åtte var Framstegspartiet, to frå Ap og to frå KrF.

Negativ evaluering
Nils Marton Aadlag gjorde greie for Høgre sitt syn i saka. Han viste til at evalueringa i kommunar med direkteval av ordførar ikkje førte til at fleire gjekk til valurnene. I desse kommunane var faktisk deltakinga tre prosent under gjennomsnittet, sa han. Han viste og til ein kommune der ein populær ordførar vart vald, men at han vart totalt vingeklipt i løpet av perioden på grunn av manglande stønad i kommunestyret. Høgre ville difor gå imot å søkja om direkteval.

Lojalitetskonflikt
Ove Evald Kristiansen (FrP) tok ordet og sa at det for dei var litt avgjerande kva Høgre hadde bestemt seg for i bompengesaka.
? Går Høgre inn for bompengar, vil me vurdera direkteval av ordførar, sa Kristiansen.
Men nokon bompengedebatt vart det ikkje i kommunestyret.
Henning Iversen (KrF) kunne opplysa at partiet var delt i saka. Han argumentere for å prøva direkteval, då det kunne vera spanande med noko nytt.
Helge Bauge (Ap) var skeptisk til direkteval, og meinte at ein ordførar som ikkje har fleirtal i kommunestyret kunne koma i ein lojalitetskonflikt.