Nektar å gje slepp på naust

Tilknyting til sjø er viktig for folk som bur i Masfjorden. Difor bør det liggja inne nausttomt til alle bustadtomtene som vert lagde ut i på Duesundøy, meiner rådmannen når kommunestyret i dag skal handsama Fylkesmannen si klage på reguleringsplanen for Duesundøy. Rådmannen går inn for å avvisa Fylkesmannen si klage.
Fylkesmannen meiner arealet som er avsett til naust, er for stort. Sjølv om kommunestyret kutta ut to naustområde i urørt område i den opphavlege planen og utvida eit anna, der det alt er naust, er ikkje Fylkesmannen nøgd. Han meiner det vert for mykje utbygging i strandsona.
Konflikten på Duesundøy avspeglar ein klassisk konflikt i mange kommunar. Lokalpolitikarane ønskjer å bruka tilgang til sjø som eit lokkemiddel for å få folk til å busetja seg der. Fylkesmannen vil redusera utbygging i strandsona av omsyn til ålmenta.
Masfjorden har alltid vore  ein kystkommune, og det vil han vera også i framtida. Tilknyting til sjø har vore ein tradisjon, og det bør vera også vidare, skriv rådmannen i si tilråding.
Utbygginga på Duesundøy har trekt ut i tid fordi sentrale styresmakter har hatt innvendingar mot planane. Det er Reknes Byggjevare L/L som står bak utbyggingsplanane, og fleire står i kø for å få byggja.