Nitrobeat med ny singel

«There's Dubstep In My House» heiter den nye låten som den musikkglade nittenåringen har laga.

Tittelen viser til at huset hans er fylt av elektronisk dansemusikk, noko det har vore lenge.

Viser allsidigheit

Ivan er nemleg levande opptatt av elektronisk musikk, men akkurat denne låten er ikkje heilt representativ for det han elles lagar, understrekar han.

– Eg begynte med å laga roleg musikk, så gjekk eg over til litt meir «dance» og «house».

Med denne låten vil eg visa at eg også kan miksa andre sjangrar, seier han.

Han legg til at dubstep er ein sjanger mange vil kalla «rotete», men eigentleg inneheld han berre meir gode tekniske rytmar blanda med «grove og lyse» syntar som saman utgjer ein rytmisk eksplosjon.

Lagar sin eigen vri

Det meste han lagar prøver han å gjera dansbart sidan han også er dj.

Og det skulle ikkje vera noko problem med denne låten som sprudlar av fengande rytmar med trommer og synt.

– Sjølv synest eg låten gjev ei form for tidleg sommarkjensle blanda med fengande trommer og synt, forklarer han.

Han fortel at han kjem til å halda på house-sjangeren, men blander han godt med dubstep for å få ein meir merkeleg vri som gjenspeglar han som artist.

Tjuvstartar fredag

Singelsleppet 1. februar, er ein del av planlegginga av eit debutalbum, får me vita. Og alt i morgon fredag, skal han ha førpremiere for 300 menneske på eit skuleball i Åsane.

– Då blir det stort show med lys- og lydeffektar, seier han.

Sitt fjerde plateslepp hadde han i mai i fjor.

Då gav han ut EP-en «Nothing Comes Easy», med blant anna låten «A cloud of my dreams» med Sofie B. Nilsen på vokal.

Låtane Ivan skriv, legg han ut på spotify, itunes, beat, amazon og andre nettstader ein kan høra musikk.